ആലപ്പുഴ: റോഡപകടങ്ങള്ക്കെതിരെ തദ്ദേശസ്വയംഭരണ സ്ഥാപനങ്ങളുടെ നേതൃത്വത്തില് വ്യാപക ബോധവല്ക്കരണം നടത്തണമെന്ന് മന്ത്രി ജി. സുധാകരന് പറഞ്ഞു. മുഖ്യമന്ത്രിയുടെ ദുരിതാശ്വാസ നിധിയില് നിന്നും അമ്പലപ്പുഴ നിയോജക മണ്ഡലത്തിന് അനുവദിച്ച 24.16 ലക്ഷം രൂപയുടെ ധനസഹായ വിതരണ ഉദ്ഘാടനം നിര്വഹിക്കുകയായിരുന്നു അദ്ദേഹം.
റോഡപകടത്തില് മരണം സംഭവിക്കുന്നവരുടെ എണ്ണം വര്ധിക്കുകയാണ്. റോഡിന്റെ അവസ്ഥയാണ് ഇതിനുകാരണമായി പലപ്പോഴും ചൂണ്ടിക്കാണിക്കുന്നതെങ്കിലും അമിതവേഗതയും അശ്രദ്ധയും കൊണ്ടാണ് അപകടങ്ങള് കൂടുതലും സംഭവിക്കുന്നതെന്ന് അദ്ദേഹം പറഞ്ഞു. വേഗം നിയന്ത്രിച്ചു ശ്രദ്ധാപൂര്വം വാഹനം ഓടിക്കുന്നതിന് ചെറുപ്പക്കാര് ഉള്പ്പെടെയുള്ളവര് തയാറാകണം. വാഹനം ഓടിക്കുന്നവരെ വിവിധ മാര്ഗ്ഗത്തിലൂടെ ബോധവല്ക്കരിക്കുന്നതിനുള്ള ദൗത്യം തദ്ദേശസ്വയംഭരണ അദ്ധ്യക്ഷന്മാരും ജനപ്രതിനിധികളും ഏറ്റെടുക്കണമെന്നും മന്ത്രി പറഞ്ഞു.
ഗുരുതരമായി വൃക്കരോഗം ബാധിച്ച് ചികിത്സയില്ക്കഴിയുന്ന നാല് പേര്ക്കു മൂന്നു ലക്ഷം രൂപ വീതം നല്കി. കൂടാതെ വിവിധ രോഗങ്ങള് ബാധിച്ച് ചികിത്സയില്ക്കഴിയുന്ന 97 പേര്ക്കായി 12.16 ലക്ഷം രൂപയും വിതരണം ചെയ്തു. ബ്ലോക്ക് പഞ്ചായത്ത് പ്രസിഡന്റ് പ്രജിത് കാരിക്കല് അദ്ധ്യക്ഷനായി.
