ഇരിട്ടി: കര്ണ്ണാടകത്തില് നിന്നും കേരളത്തിലേക്ക് മാക്കൂട്ടം ചുരംവഴി മദ്യവും, ലഹരി വസ്തുക്കളും, സ്ഫോടകവസ്തുക്കളും മറ്റും കടത്തുന്നത് തടയാന് 24 മണിക്കൂര് പിക്കറ്റ് പോസ്റ്റ് ഏര്പ്പെടുത്തി. അതിര്ത്തിയായ കൂട്ടുപുഴയില് ഇരിട്ടി ഡിവൈഎസ്പി പ്രജീഷ് തോട്ടത്തില്, സിഐ എം.ആര്.ബിജു എന്നിവരുടെ നേതൃത്വത്തിലാണ് പരിശോധന നടക്കുന്നത്. ചരക്കു വാഹനങ്ങള് പച്ചക്കറി വണ്ടികള്, ബസ്സുകള് അടക്കമുള്ള യാത്രാവാഹനങ്ങള് എന്നിവ മുഴുവനായും പരിശോധിച്ച ശേഷം മാത്രമാണ് കടത്തി വിടുന്നത്.
വിദേശമദ്യം, പുകയില ഉത്പന്നങ്ങള്, സ്ഫോടക വസ്തുക്കള് എന്നിവ ഇതുവഴി ധാരാളമായി കടന്നു വരുന്നുണ്ട്. ഹുന്സൂര്, മൈസൂര് തുടങ്ങിയ സ്ഥലങ്ങളില് നിന്നും പച്ചക്കറി വണ്ടികളില് സ്ഫോടക വസ്ത്തുക്കള് എത്തുന്നതായും വിവരമുണ്ട്. അനധികൃത ക്വയറികള്ക്കു വേണ്ടിയാണു വെടിമരുന്നു ഡിറ്റണേറ്ററുകളും ഇവിടേയ്ക്ക് കടത്തി കൊണ്ടുവരുന്നത്.
ഓണം, ബക്രീദ് ആഘോഷത്തിരക്കിനിടയില് പോക്കറ്റടി, മറ്റ് മാഫിയാ പ്രവര്ത്തനങ്ങള് എന്നിവ തടയാന് ഇരിട്ടി ടൗണിന്റെ വിവിധ മേഖലകളില് മഫ്ടിയില് അടക്കമുള്ള പോലീസിനെയും നിയോഗിച്ചു. ബസ്സില് നിന്നും തിരക്കുണ്ടാക്കി ഒരു വിദ്യാര്ത്ഥിനിയുടെ ബാഗ് തടത്തിയെടുത്ത തമിഴ്നാട്ടില് നിന്നുമുള്ള ചില സ്ത്രീകളടക്കമുള്ള സംഘങ്ങളെ ഇതിനിടെ മേഖലയില് നിന്നും പോലീസ് പിടികൂടിയിരുന്നു. ഇതെല്ലാം കണക്കിലെടുത്തുള്ള സുരക്ഷാ ക്രമീകരണങ്ങളാണ് ഇരിട്ടി പേരാവൂര്, മട്ടന്നൂര് സര്ക്കിളുകളില് പോലീസ് ഒരുക്കിയിരിക്കുന്നത്.
പള്ളിയറ ശ്രീധരന്റെ ഗണിതശബ്ദകോശം
പ്രകാശനം ചെയ്തു
കണ്ണൂര്: പ്രശസ്ത ഗണിതാദ്ധ്യാപകനും സംസ്ഥാന ബാലസാഹിത്യ ഇന്സ്റ്റിറ്റിയൂട്ട് ഡയറക്ടറുമായ പള്ളിയറ ശ്രീധരന് രചിച്ച് കേരള ഭാഷാ ഇന്സ്റ്റിറ്റിയൂട്ട് പസിദ്ധീകരിച്ച ഗണിതശബ്ദകോശം പുസ്തകം വിദ്യാഭ്യാസവകുപ്പ് മന്ത്രി പ്രൊഫ. സി.രവീന്ദ്രനാഥ് പ്രകാശനം ചെയ്തു. ഐ.ടി.അറ്റ് സ്കൂള് എക്സിക്യൂട്ടീവ് ഡയറക്ടര് കെ.അന്വര്സാദത്ത് പുസ്തകം ഏറ്റുവാങ്ങി.
കേരള ഭാഷാ ഇന്സ്റ്റിറ്റിയൂട്ട് എന്.വി.ഹാളില് നടന്ന പരിപാടിയില് ഡയറക്ടര് പ്രൊഫ.വി.കാര്ത്തികേയന് നായര് അദ്ധ്യക്ഷത വഹിച്ചു. 75 രൂപ വിലയുള്ള പുസ്തകം ഇന്സ്റ്റിറ്റിയൂട്ട് വില്പനശാലകളില് ലഭ്യമാണ്.
