ഉപകാരം ചെയ്യേണ്ട. ഉപദ്രവിക്കരുതേ. കാലത്തിനനുസരിച്ചോ സന്ദര്ഭങ്ങള്ക്കനുസരിച്ചോ ചെറിയ മാറ്റങ്ങള് ആകാമെങ്കിലും മറ്റുതരത്തിലുള്ള കടന്നുകയറ്റങ്ങള് നീതീകരിക്കത്തക്കതല്ല.
പുരാണങ്ങള് നമ്മുടെ സാംസ്കാരിക അന്തസ്സത്തയുടെ ഭാഗമാണ്. അവ നമ്മുടെ ജീവിതക്രമത്തിന്റെ അടിസ്ഥാനവുമാണ്. പുരാണങ്ങളില് പരാമര്ശിക്കുന്ന ഓരോ കഥാപാത്രത്തിനും ഓരോ അര്ത്ഥവും സന്ദേശവുമുണ്ട്. അതില് അപഭ്രംശം ഉണ്ടാക്കുന്നത് അനീതിയായേ കാണാന് പറ്റൂ.
സീത രാവണന്റെ രണ്ടാം ഭാര്യയായിക്കഴിഞ്ഞുവെന്നും, സീതയ്ക്ക് രാവണനെ ആരാധന ആയിരുന്നെന്നുമൊക്കെ വലിയ സാഹിത്യസമ്രാട്ടുകളാരെങ്കിലും എഴുതിപ്പിടിപ്പിക്കാന് തുടങ്ങിയാല് ആര്ക്കും ഒന്നും ചെയ്യാനാവില്ല. കന്യകയായ മറിയം എങ്ങനെ യേശുവിനെ പ്രസവിച്ചുവെന്ന് ഈ സാഹിത്യകാരന്മാരെങ്കിലും എഴുതിപ്പിടിപ്പിക്കുമോ?
അഹല്യയ്ക്ക് ദേവേന്ദ്രനെ ഇഷ്ടമായിരുന്നെന്നോ അവരുടെ സമ്മതത്തോടെയായിരുന്നു ആശ്രമത്തില് എത്തിപ്പെട്ടതെന്നോ ആരൊക്കെയോ എഴുതിക്കണ്ടു. തിമിരം ബാധിച്ചവന് കാഴ്ച കുറയും. കാണേണ്ട രീതിയില് കാണാനും കഴിയില്ല. അഹല്യ ആരാണെന്നോ എന്താണെന്നോ മനസ്സിലാക്കാനോ, ആ ചിന്തകളുടെ ഏഴയലത്തു എത്താനോ നമുക്കാര്ക്കും കഴിയില്ല.
ശ്രദ്ധയോടെ വായിച്ച് മനസ്സിലാക്കി ഹൃദിസ്ഥമാക്കി വയ്ക്കാനുള്ളതാണ് പുരാണങ്ങളും രാമായണവും ഭാഗവതവുമൊക്കെ. അത്യഗാധമായ വീക്ഷണപാടവത്തോടെയാണ് അവയൊക്കെ എഴുതപ്പെട്ടിട്ടുള്ളത്. അതൊന്നും മാറ്റിയെഴുതലല്ല അഭികാമ്യം. കാലാനുസൃതമായ നല്ല മാറ്റങ്ങള് കൃതികളിലാകാം. തെറ്റായവ യാതൊരു കാരണവശാലും പാടില്ല.
അതിക്രമവും കയ്യിട്ടുവാരലും ക്ഷേത്രങ്ങളില് നടത്തുന്നതു പോരാഞ്ഞിട്ടോ പുരാണങ്ങളിലേക്കുള്ള ഈ കൈയേറ്റം.
കെ. എസ്. കുട്ടികൃഷ്ണന്,
പുളിയറക്കോണം, തിരുവനന്തപുരം
