കണ്ണൂര്: മലബാറിലെ മതംമാറ്റ കല്യാണങ്ങള് രഹസ്യാന്വേഷണ വിഭാഗം അന്വേഷിക്കുന്നു. തീവ്രവാദ ബന്ധമുണ്ടെന്ന സംശയമാണ് കാരണം. 35 ഓളം വിവാഹങ്ങളാണ് അന്വേഷിക്കുക. പ്രണയവിവാഹങ്ങളാണ് ഇവ എന്നാണ് പ്രചരിപ്പിക്കുന്നതെങ്കിലും നാമമാത്രമായവ മാത്രമാണ് പ്രണയ വിവാഹങ്ങളെന്ന നിഗമനത്തിലാണ് പോലീസ്. 25 ഓളം വിവാഹങ്ങളെക്കുറിച്ചും സംശയമുണ്ടെന്നാണ് ഉന്നത പോലീസ് ഉദ്യോഗസ്ഥര് നല്കുന്ന സൂചന. ഇത്തരം വിവാഹങ്ങളെക്കുറിച്ച് പ്രാഥമികാന്വേഷണം നടത്തി റിപ്പോര്ട്ട് നല്കാനാണ് ഡിജിപി കീഴുദ്യോഗസ്ഥര്ക്ക് നിര്ദ്ദേശം നല്കിയിരിക്കുന്നത്.
പാലക്കാട്, മലപ്പുറം, കോഴിക്കോട് ജില്ലകളിലെ ജില്ലാ പോലീസ് മേധാവിമാര്, സ്പെഷ്യല് ബ്രാഞ്ച് ഉദ്യോഗസ്ഥര്, ഇത്തരം വിഷയങ്ങള് കൈകാര്യം ചെയ്യുന്ന ഡിവൈഎസ്പിമാര്,സൈബര് സെല് ഉദ്യോഗസ്ഥര് എന്നിവര് പങ്കെടുത്ത യോഗത്തിലാണ് തീരുമാനം. മലപ്പുറം, കാസര്കോട്, കണ്ണൂര് ജില്ലകളിലുള്ളവര്ക്ക് ഐഎസ് ബന്ധം സ്ഥിരീകരിച്ച പശ്ചാത്തലത്തില് കൂടിയാണിത്.
പോലീസിന് പരാതി ലഭിച്ച കാസര്കോട്, കണ്ണൂര്, പാലക്കാട് ജില്ലകളിലെ ചില വിവാഹങ്ങളെ കുറിച്ച് പ്രത്യേകമായി അന്വേഷിക്കാന് തീരുമാനമായിട്ടുണ്ട്. ഡിവൈഎസ്പി തലത്തിലുള്ളവരാണ് വിവാഹ സംബന്ധമായ വിഷയങ്ങള് അന്വേഷിക്കുക. തീവ്രവാദ ബന്ധം കണ്ടെത്തിയാല് കേസ് ദേശീയ അന്വേഷണ ഏജന്സിക്ക് കൈമാറും.
കണ്ണൂര് പരിയാരത്തെ സംഭവം ഹൈക്കോടതിയുടെ പരിഗണനയിലാണ്. ഇത് പ്രണയവിവാഹം മാത്രമായിരുന്നോയെന്നത് അന്വേഷിക്കും. സംസ്ഥാനത്തിന്റെ വിവിധ ഭാഗങ്ങളില് എന്ഐഐയുടെ അന്വേഷണപരിധിയില് വരാത്ത ചില കേസുകള്ക്ക് തീവ്രവാദബന്ധമുണ്ടെന്ന് കണ്ടെത്തിയതായും അറിയുന്നു.
പരിയാരം സ്വദേശിനിയെ വിവാഹം ചെയ്ത ശേഷം പ്രമുഖ മതസംഘടനയുടെ നേതൃത്വത്തില് സിറിയയിലേക്ക് അയക്കാന് ശ്രമം നടന്നതായി ഹൈക്കോടതിയില് പരാതി ലഭിച്ചിരുന്നു. ഇത് സംബന്ധിച്ച് ഏതാനും ദിവസം മുമ്പ് ഹൈക്കോടതി ഡിജിപിയോട് റിപ്പോര്ട്ടും തേടിയിരുന്നു.
