ആലപ്പുഴ: ജില്ലയില് കൃഷിഭവനുകളുടെയും വിവിധ കര്ഷക സംഘടനകളുടെയും നേതൃത്വത്തില് ചിങ്ങം ഒന്ന് കര്ഷക ദിനമായി ആചരിച്ചു. വ്യത്യസ്തമായ പരിപാടികളാണ് സംഘടിപ്പിച്ചത്.
അമ്പലപ്പുഴ തെക്ക് പഞ്ചായത്തിന്റെ സഹകരണത്തോടെ അമ്പലപ്പുഴ കൃഷിഭവന് ചിറക്കോട് പള്ളി അങ്കണത്തില് സംഘടിപ്പിച്ച കര്ഷക ദിനാചരണം മന്ത്രി ജി.സുധാകരന് ഉദ്ഘാടനം ചെയ്തു. പഞ്ചായത്ത് പ്രസി: ജി.വേണുലാല് അദ്ധ്യക്ഷനായി.
കടക്കരപ്പള്ളി പഞ്ചായത്തില് ജില്ലാ പഞ്ചായത്ത് ക്ഷേമകാര്യ സ്റ്റാന്ഡിങ് കമ്മിറ്റി ചെയര്പേഴ്സണ് സന്ധ്യാബെന്നി ഉദ്ഘാടനം ചെയ്തു. പ്രസിഡന്റ് പത്മിനി പങ്കജാക്ഷന് അദ്ധ്യക്ഷയായി. കൃഷി ഓഫീസര് ടി.ആര്. സ്വപ്ന, ഇ.ബി. ശശിധരന്, ജെ. ജഗദീഷ്, ആര്. ഗീതമ്മ, കെ. സുരേഷ്ബാബു, മെര്ളിന് സുരേഷ് എന്നിവര് പ്രസംഗിച്ചു.
പുന്നപ്ര എംഇഎസ് ഇംഗ്ലീഷ് മീഡിയം സ്കൂളില് ഫാം ക്ലബ്ബിന്റെ ആഭിമുഖ്യത്തില് കര്ഷകദിനം ആചരിച്ചു. അടുക്കളത്തോട്ട രംഗത്ത് മികവു പുലര്ത്തിയ കര്ഷകന് പി. പങ്കജാക്ഷന്പിള്ളയെ ആദരിച്ചു. കൃഷിവിജ്ഞാനസദസ്സും നടത്തി.
തകഴി കാര്മ്മല് സ്കൂളിന്റെ നേതൃത്വത്തില് കര്ഷകദിനം ആഘോഷിച്ചു. കുട്ടികളുടെ മാനസികവും ശാരീരകവും ബൗദ്ധികവുമായ പ്രവര്ത്തനങ്ങളെ മികച്ച രീതിയില് പരിപോഷിപ്പിക്കുന്നതിനും സ്വന്തം വീട്ടുവളപ്പില് നല്ല ജൈവ പച്ചക്കറി കൃഷി എങ്ങനെ നടത്താം എന്നതിനെ കുറിച്ച് കൃഷി അസിസ്റ്റന്റ് ശരത് ക്ലാസ് നയിച്ചു. മുതിര്ന്ന കര്ഷകന് മാത്യൂസ് തെന്നടി തന്റെ കൃഷി അനുഭവങ്ങള് കുട്ടികളുമായി പങ്കുവച്ചു. ഷാജി വര്ഗീസ്, ജിജി ജോസഫ് എന്നിവര് പ്രസംഗിച്ചു. വിവിധയിനം വിത്തുകളും വിതരണം ചെയ്തു.
കാര്ഷിക ഭൂമി നികര്ത്തി റിസോര്ട്ടുകളും മണിമാളികകളും പണിതുയര്ത്തുകയും റിസോര്ട്ടിലേക്ക് റോഡ് പണി നടത്തുകയും ചെയ്ത തോമസ് ചാണ്ടി മന്ത്രി സ്ഥാനവും ജനപ്രതിനിധി സ്ഥാനവും രാജിവയ്ക്കണമെന്ന് കേരള കര്ഷക ജനപക്ഷം സംസ്ഥാന പ്രസിഡന്റ് ആന്റണി കരിപ്പാശേരി ആവശ്യപ്പെട്ടു. കര്ഷക ദിനാചരണം ഉദ്ഘാടനം ചെയ്യുകയായിരുന്നു. ജില്ലാ പ്രസിഡന്റ് ജോഷി പരുത്തിക്കല് അദ്ധ്യക്ഷത വഹിച്ചു. കേരള ജനപക്ഷം ജില്ലാ പ്രസിഡന്റ് ബേബി പാറക്കാടന് കര്ഷക ദിനാചരണ സന്ദേശം നല്കി.
മുഹമ്മ കൃഷിഭവന്റെ നേതൃത്വത്തില് കര്ഷകരെ ആദരിച്ചു. ആര്യാട് ബ്ലോക്ക് പഞ്ചായത്ത് പ്രസിഡന്റ് അഡ്വ.ഷീനാ സനല്കുമാര് സമ്മേളനം ഉദ്ഘാടനം ചെയ്തു. മുഹമ്മ പഞ്ചായത്ത് പ്രസിഡന്റ് ജെ ജയലാല് അധ്യക്ഷനായി.
മണ്ണഞ്ചേരിയില് അഡ്വ.ഷീനാസനല്കുമാര് ഉദ്ഘാടനം ചെയ്തു. മണ്ണഞ്ചേരി പഞ്ചായത്ത് പ്രസിഡന്റ് തങ്കമണി ഗോപിനാഥ് അധ്യക്ഷയായി.
കഞ്ഞിക്കുഴി സര്വ്വീസ് സഹകരണ ബാങ്കിന്റെ നേതൃത്വത്തില് ആരംഭിച്ച ഫാം ഹെല്ത്ത് ക്ലബ്ബിന്റെ ഉദ്ഘാടം ജില്ലാ പഞ്ചായത്ത് പ്രസിഡന്റ് ജി വേണുഗോപാല് നിര്വഹിച്ചു.ബാങ്ക് പ്രസിഡന്റ് അഡ്വ.എം സന്തോഷ്കുമാര് അധ്യക്ഷനായി.
