കുട്ടനാട്: കര്ഷകരോടു കാണിക്കുന്ന അവഗണന തുടരുന്ന സാഹചര്യത്തില് ചിങ്ങം ഒന്നിനു നടത്തുന്ന കര്ഷക ദിനാചരണം ബഹിഷ്കരിക്കാന് തീരുമാനിച്ചതായി കുട്ടനാട് വികസന സമിതി എക്സിക്യൂട്ടീവ് ഡയറക്ടര് ഫാ. തോമസ് പീലിയാനിക്കല് പറഞ്ഞു.
ആലപ്പുഴ,കോട്ടയം,പത്തനംതിട്ട ജില്ലകളിലെ കര്ഷകരുടെ സമര പ്രഖ്യാപന കണ്വന്ഷന് ഉദ്ഘാടനം ചെയ്യുകയായിരുന്നു.
മൂന്നു ജില്ലകളിലെയും കര്ഷകര് കര്ഷക ദിനം ബഹിഷ്കരിച്ചു കരിദിനം ആചരിക്കാനും,കര്ഷക പ്രതിഷേധ സമരം നടത്താനും തീരുമാനിച്ചു.നെല്ലു വില ഒന്നിച്ചു നല്കുക, മുടങ്ങിക്കിടക്കുന്ന പമ്പിങ് സബ്സിഡി, പ്രൊഡക്ഷന് ബോണസ്,വളം, വിത്ത് എന്നിവയുടെ സബ്സിഡി നല്കുക,കൈകാര്യചെലവ് വര്ധിപ്പിക്കുക, കൃഷിനാശത്തിന്റെ നഷ്ടപരിഹാരത്തുക നല്കുക തുടങ്ങി പത്തില് പരം ആവശ്യങ്ങളുന്നയിച്ചാണു ബഹിഷ്കരണം നടത്തുന്നത്.
കര്ഷക ദിനത്തില് എടത്വയില് വികസന സമിതിയുടെ നേതൃത്വത്തില് പ്രതിഷേധ സമരം നടത്തുമെന്നും ഫാ. തോമസ് പീലിയാനിക്കല് അറിയിച്ചു. യോഗത്തില് ശിവന് തുണ്ടിയില് അധ്യക്ഷത വഹിച്ചു.
