കൊച്ചി: സഹകരണ സംഘങ്ങളിലേക്കുള്ള നിയമനത്തിന് ഭരണ സമിതി നടത്തുന്ന എഴുത്തു പരീക്ഷയുടെ ചുമതല വ്യക്തികളെ ഏല്പിക്കാമെന്ന സഹകരണ രജിസ്ട്രാറുടെ ഉത്തരവ് ഹൈക്കോടതി രണ്ടു മാസത്തേക്ക് സ്റ്റേ ചെയ്തു. സഹകരണ രജിസ്ട്രാറുടെ ഉത്തരവിന്റെ അടിസ്ഥാനത്തില് ആലപ്പുഴ ചെന്നിത്തല തൃപ്പെരുന്തുറ സര്വീസ് സഹകരണ ബാങ്കിലേക്കുള്ള നിയമനത്തിനായി ഓഗസ്റ്റ് 12 ന് നടത്താനിരുന്ന പരീക്ഷയും സ്റ്റേ ചെയ്തിട്ടുണ്ട്.
സഹകരണ സംഘത്തിന്റെ ചട്ടമനുസരിച്ച് 1991ല് കൊണ്ടുവന്ന സര്ക്കുലറില് പരീക്ഷകളുടെ ചുമതല പുറത്തുനിന്നുള്ള ഏജന്സികളെ ഏല്പിക്കാന് നിര്ദേശിച്ചിരുന്നു. എന്നാല് വ്യക്തികളോ സഹകരണ വകുപ്പില് നിന്ന് വിരമിച്ച ഉദ്യോഗസ്ഥര് നേതൃത്വം നല്കുന്നവയോ ആയിരിക്കരുതെന്ന് 2010 ല് ഹൈക്കോടതി സിംഗിള്ബെഞ്ച് വിധിച്ചിരുന്നു. 2011 ല് ഡിവിഷന് ബെഞ്ച് ഇതു ശരിവെച്ചു.
ഇതു മറികടന്നാണ് 2011 ല് സഹകരണ രജിസ്ട്രാര് എഴുത്തു പരീക്ഷയുടെ ചുമതല വ്യക്തികളെ ഏല്പിക്കാമെന്ന വ്യവസ്ഥ കൊണ്ടു വന്നതെന്ന് ആരോപിച്ച് മാവേലിക്കര സ്വദേശി ടി.വി. രത്നകുമാരി നല്കിയ ഹര്ജിയിലാണ് സിംഗിള് ബെഞ്ചിന്റെ ഇടക്കാല ഉത്തരവ്.
