ആലപ്പുഴ: പുന്നമടയിലെ പൂരം നെഹ്റുട്രോഫി ജലമേളയ്ക്ക് ഇനി രണ്ടു നാള്, തുഴവേഗത്തിന്റെ പോരാട്ടത്തില് ജേതാവായി വെള്ളിക്കപ്പ് സ്വന്തമാക്കാനുള്ള ഒരുക്കത്തിലാണ് ചുണ്ടന്മരൊന്നാകെ.
കരകളിലെ ജലാശയങ്ങളില് ആഴ്ചകളായി നടത്തിവന്ന പരിശീലനം നടത്തിയ ചുണ്ടനുകള് പുന്നമടയിലെ ട്രാക്കില് തീവ്ര പരിശീലനം ഇന്നു പൂര്ത്തിയാക്കും. ഇന്ന് വൈകിട്ടോടെയാണ് ചുണ്ടനുകളുടെ അവസാനവട്ട പരിശീലന തുഴച്ചില്.
കുറഞ്ഞ സമയത്തില് 1,250 മീറ്റര് ദൈര്ഘ്യം തുഴഞ്ഞെത്തുന്നതിനുള്ള തന്ത്രങ്ങളൊരുക്കിയാണ് ക്ലബുകളെല്ലാം പരിശീലനം നടത്തുന്നത്. പുന്നമടയില് ന?ടത്തുന്ന പരിശീലന തുഴച്ചില് കാണാന് വിനോദസഞ്ചാരികളടക്കം നൂറുകണക്കിന് ആളുകളാണെത്തിയത്.
ചിട്ടയായ പരിശീലനത്തിനൊപ്പം സാങ്കേതിക വിദ്യകള് കൂടി പ്രയോജനപ്പെടുത്തിയാണ് ക്ലബുകള് തങ്ങളുടെ തുഴച്ചില്കാരുടെ മികവ് ഓരോ ദിവസവും മെച്ചപ്പെടുത്തുന്നത്. പരിശാലന തുഴച്ചില് ക്യാമറയില് പകര്ത്തി പോരായ്മകള് മനസ്സിലാക്കി അത് തുഴച്ചിലുകാര്ക്ക് വിശദമാക്കി കൊടുക്കുകയും, അതിനെ മറികടക്കാനുള്ള തന്ത്രങ്ങള് പുറത്തെടുത്തുമാണ് പരിശീലനം.
ഇന്നത്തെ പരിശീലന തുഴച്ചിലിന് ശേഷം ചുണ്ടന് കരയ്ക്കെത്തിച്ച് പുക നല്കും. മത്സരദിവസം വെള്ളത്തിനുമുകളിലൂടെ അസ്ത്രം പോലെ പായുന്നതിനുള്ള പൊടികൈകള് വള്ളത്തില് നടത്തുന്നതും ഈ സമയത്താണ്. നാളെ തുഴച്ചില്കാര്ക്കും പൂര്ണ വിശ്രമമാണ്.
ശനിയാഴ്ച ഉച്ചയോടെ അവര് ചുണ്ടനുകളില് പുന്നമടയിലെ കുഞ്ഞോളങ്ങളിലേക്ക് പതുക്കെ തുഴഞ്ഞെത്തും, കരക്കാരുടെ സ്വപ്നം യാഥാര്ത്ഥ്യമാക്കാന്.
