കരുവാരകുണ്ട്: സഹോദരതുല്യരായ സുഹൃത്തുക്കള്, വാഹനാപകടത്തിന്റെ രൂപത്തിലെത്തി മരണം ഇരുവരെയും ഒരുമിച്ച് ഈ ലോകത്ത് നിന്ന് കൊണ്ടുപോയി.
ഇന്നലെ രാവിലെ കോട്ടോപ്പാടം വേങ്ങ അയ്യപ്പന്കാവിന് സമീപത്ത് വെച്ചാണ് സഹപാഠികളായ ശ്രീലാലും ജസീമും സഞ്ചരിച്ച സ്കൂട്ടര് സ്വകാര്യബസുമായി കൂട്ടിയിടിച്ചത്. സംഭവ സ്ഥലത്ത് വെച്ച് തന്നെ മണികണ്ഠ ശ്രീലാല് (20) മരിച്ചു. ഗുരുതരമായി പരിക്കേറ്റ ജസീമിനെ ഉടന് തന്നെ നാട്ടുകാര് പെരിന്തല്മണ്ണയിലെ സ്വകാര്യ ആശുപത്രിയിലെത്തിച്ചു. എന്നാല് ഉച്ചക്ക് ശേഷം ജസീമും മരണത്തിന് കീഴടങ്ങുകയായിരുന്നു.
മണ്ണാര്ക്കാട് എംഇഎസ് കോളജിലെ വിദ്യാര്ത്ഥികളാണ് ഇരുവരും. കരുവാരകുണ്ട് ഇരിങ്ങാട്ടിരി സ്വദേശിയും പോസ്റ്റുമാനുമായ മേച്ചരീ ശ്രീധരന്റെ മകനാണ് മരിച്ച ശ്രീലാല്. അപകടം വിവരം അറിഞ്ഞത് മുതല് നാടും സഹപാഠികളും ജസീമിനെയെങ്കിലും തങ്ങള്ക്ക് തിരികെ നല്കണമേയെന്ന പ്രാര്ത്ഥനയിലായിരുന്നു. പക്ഷേ എല്ലാം വിഫലമായി.
കരുവാരക്കുണ്ട് അരവിന്ദ വിദ്യാനികേതന് സ്കൂളിലെ അദ്ധ്യാപിക സിന്ധുവാണ് ശ്രീലാലിന്റെ അമ്മ. സഹോദരങ്ങള് ശ്രീലക്ഷ്മി, മണികണ്ഠശ്രീരാഗ്, ശ്രീനന്ദ. ചിറട്ടകുളം സ്വദേശിയും എടത്തനാട്ടുകര സ്കൂള് അദ്ധ്യാപകനുമായ കരീമിന്റെ മകനാണ് മരിച്ച ജസീം.
