കല്ലൂര്: പാടംവഴിയിലുള്ള ബവ്റിജസ് ഔട്ട്ലെറ്റിലേയ്ക്ക് മദ്യം വാങ്ങാനെത്തിയ ആള് നടുറോഡില് വാന് നിറുത്തിയിട്ട് ഗതാഗതം തടസപ്പെടുത്തിയതായി പരാതി. ഞായറാഴ്ച രാവിലെ 10 മണിയോടെ പാടംവഴി-ഞെള്ളൂര് റോഡിലാണ് വാഹനം പാര്ക്ക് ചെയ്ത് ഗതാഗതം തടസപ്പെടുത്തി മദ്യം വാങ്ങാന് പോയത്. ഇതോടെ വലിയ വാഹനങ്ങള്ക്ക് കടന്നപോകാനാവാത്ത സ്ഥിതിയായി.
വീതി കുറഞ്ഞ റോഡില് 15 മിനിറ്റിലേറെ സമയം വാഹനം കിടന്നതോടെ പ്രതിഷേധവുമായി നാട്ടുകാര് എത്തി ബഹളംവെച്ചതോടെയാണ് ഡ്രൈവറെത്തി വാഹനം മാറ്റിയത്. ഇവിടെ ബവ്റിജസ് ഔട്ട്ലെറ്റ് ആരംഭിച്ചതുമുതല് മദ്യം വാങ്ങാനെത്തുന്നവരുടേയും മദ്യപന്മാരുടേയും ശല്യം ഏറുകയാണെന്ന് പ്രദേശവാസികള് പറഞ്ഞു.
വഴിയോരങ്ങളിലും സമീപത്ത് ആളൊഴിഞ്ഞ പറമ്പുകളിലും പരസ്യമായി ഇവിടെ ആളുകള് മദ്യപിക്കുന്നത് സ്ത്രീകള് ഉള്പ്പെടെയുള്ളവര്ക്ക് വഴിനടക്കാന് ബുദ്ധിമുട്ട് ഉണ്ടാക്കുന്നതായി നാട്ടുകാര് പറഞ്ഞു. ഒറ്റപ്പെട്ട സ്ഥലമായതിനാല് പലഭാഗങ്ങളില് നിന്ന് വാഹനങ്ങളില് വരുന്ന അപരിചിതര് നാട്ടുകാരുമായി വഴക്കും പതിവാണ്.
