പത്തനാപുരം: മുറുക്കാന് നല്കാത്തതിന് പച്ചക്കറിക്കട കത്തിച്ചതായി പരാതി. പട്ടാഴി മാര്ക്കറ്റ് ജങ്ഷനില് പ്രവര്ത്തിച്ചു വന്ന സ്വകാര്യവ്യക്തിയുടെ പച്ചക്കറിക്കട കത്തിനശിച്ചത്. ശനിയാഴ്ച പുലര്ച്ചയാണ് സംഭവം. പട്ടാഴി സ്വദേശി ശശിധരന് നായരുടെ ഉടമസ്ഥതയിലുളള കടയാണ് കത്തിനശിച്ചത്.
സംഭവത്തില് ദുരൂഹതയുളളതായി ഉടമസ്ഥന് പറഞ്ഞു. കഴിഞ്ഞ ദിവസം രാത്രി മൂന്ന് യുവാക്കള് കടയില് മുറുക്കാന് ചോദിച്ച് വന്നിരുന്നു.
എന്നാല് പാക്ക് ഇല്ലാത്തതു കൊണ്ട് മുറുക്കാന് കൊടുത്തില്ല. തുടര്ന്ന് വെറ്റില മാത്രം വാങ്ങി യുവാക്കള് പോകുമ്പോള് ‘നിന്റെ കട കത്തിക്കും’ എന്നു ഭീഷണിപ്പെടുത്തിയതായും ശശിധരന് നായര് പറയുന്നു.
സമീപവാസികള് എത്തിയാണ് തീയണച്ചത്. സംഭവത്തില് പ്രതിഷേധിച്ച് വ്യാപാരി വ്യവസായി ഏകോപന സമിതിയുടെ നേതൃത്വത്തില് പട്ടാഴിയില് കടകളടച്ച് പ്രതിഷേധിച്ചു.
