ന്യൂദൽഹി: മകനോടൊപ്പം ചെസ് കളിച്ചു കൊണ്ടിരിക്കുന്ന ചിത്രം ഫേസ്ബുക്കിൽ പോസ്റ്റ് ചെയ്ത മുൻക്രിക്കറ്റർ മൊഹമ്മദ് കൈഫിന് മതഭ്രാന്തന്മാരുടെ വക വിമർശനം. ഇസ്ലാമിനു എതിരാണ് കൈഫും മകനും ചെയ്യുന്നതെന്ന് പറഞ്ഞ് കൊണ്ടാണ് പലരും ചിത്രത്തിനു താഴെ കമന്റ് ചെയ്തിരിക്കുന്നത്.
ചെസ് ബോർഡിനു മുന്നിൽ മകനോടൊപ്പം ഇരിക്കുന്ന ചിത്രം പോസ്റ്റ് ചെയ്ത നിമിഷങ്ങൾക്ക് തന്നെയാണ് കമന്റുകൾ പോസ്റ്റ് ചെയ്യപ്പെട്ടത്. ചെസ് കളിക്കുന്നത് പാപമാണ് അത് ഉപേക്ഷിക്കൂ, ഇസ്ലാം മതം അനുസരിച്ച് ജീവിക്കാൻ ശ്രമിക്കു തുടങ്ങി ഒട്ടനവധി കമന്റുകളാണ് പോസ്റ്റ് ചെയ്തത്.
എന്നാൽ കുറച്ചു പേർ കൈഫിനെ അനുകൂലിക്കുന്നുമുണ്ട്. ചെസിനെ നിങ്ങൾ എതിർക്കുന്നുണ്ടെങ്കിൽ എന്തുകൊണ്ടാണ് ഫേസ്ബുക്ക് ഉപയോഗിക്കുന്നതെന്ന് ചിലർ ചോദിക്കുന്നു. വിമർശിക്കുന്നവർ ആദ്യം വിദ്യാസമ്പന്നരും ബോധവാന്മാരാകു എന്നും ചിലർ കമന്റ് ചെയ്തിട്ടുമുണ്ട്.
ഇത് ആദ്യമായിട്ടല്ല കൈഫ് മതഭ്രാന്തന്മാരുടെ വിമർശനങ്ങൾക്ക് ഇരയാകുന്നത്. നേരത്തെ സൂര്യനമസ്കാരം ചെയ്യുന്നതിന്റെ ചിത്രങ്ങൾ പോസ്റ്റ് ചെയ്തതിന് അദ്ദേഹത്തെ നിരവധിപ്പേർ വിമർശിച്ചിരുന്നു. എന്നാൽ ശരീരത്തിന് ഇത്രയും ഊർജ്ജസ്വലത നൽകുന്ന വ്യായാമം മറ്റൊന്നില്ലെന്നാണ് അദ്ദേഹം പറഞ്ഞത്.
