കൊച്ചി : ലോക അത്ലറ്റിക് ചാംപ്യന്ഷിപ്പില് പി. യു. ചിത്രയെ പങ്കെടുപ്പിക്കണമെന്ന് ഹൈക്കോടതി ഉത്തരവിട്ടു. ഉത്തരവ് നടപ്പാക്കാന് കേന്ദ്ര സര്ക്കാര് നിര്ദേശിക്കുക കൂടി ചെയ്തതോടെ ലണ്ടന് ലോക ചാംപ്യന്ഷിപ്പില് 1500 മീറ്ററില് ഇന്ത്യക്കായി ചിത്ര ഓടുമെന്നുറപ്പായി.
ചാംപ്യന്ഷിപ്പിനുള്ള ഇന്ത്യന് ടീമില് നിന്ന് ചിത്രയെ ഒഴിവാക്കിയ സെലക്ഷന് സമിതി തീരുമാനം സുതാര്യമല്ലെന്നു വിലയിരുത്തിയാണ് ഇടക്കാല ഉത്തരവ്. ചിത്രയെ ഒഴിവാക്കി അനര്ഹരെ ഉള്പ്പെടുത്തിയ നടപടി നിയമപരമല്ലെന്നും ഫെഡറേഷന്റെ ഇടപെടല് ശരിയായ ദിശയിലല്ലെന്നും ഹൈക്കോടതി കണ്ടെത്തി. ഹര്ജിയില് തിങ്കളാഴ്ച വിശദവാദം കേള്ക്കും. ദേശീയ അത്ലറ്റിക് ഫെഡറേഷനും കേന്ദ്ര സര്ക്കാരിനുമാണ് കോടതി നിര്ദേശം നല്കിയത്. ഓഗസ്റ്റ് നാല് മുതല് 13 വരെയാണ് ലണ്ടന് മീറ്റ്.
1500 മീറ്ററില് ചിത്രയുടെ പങ്കാളിത്തം ഉറപ്പാക്കണമെന്ന് ഉത്തരവില് പറയുന്നു. ലോക മീറ്റിനുള്ള ടീമില് നിന്ന് ഒഴിവാക്കിയതിനെതിരെ ചിത്ര നല്കിയ ഹര്ജിയാണ് പരിഗണിച്ചത്.
ആദ്യം വിശദീകരണം നല്കാന് തയ്യാറാകാതിരുന്ന ഫെഡറേഷന് ഇന്നലെ അഭിഭാഷകന് മുഖേന മറുപടി സത്യവാങ്മൂലത്തിന് സമയം തേടുകയായിരുന്നു. എന്നാല് ചിത്ര പങ്കെടുക്കേണ്ട 1500 മീറ്റര് ഓഗസ്റ്റ് നാലിനാണെന്ന് ചിത്രയുടെ അഭിഭാഷകന് ചൂണ്ടിക്കാട്ടിയതോടെയാണ് സിംഗിള് ബെഞ്ച് ഇടക്കാല ഉത്തരവ് നല്കിയത്.
