മട്ടന്നൂര്: മട്ടന്നൂര് നഗരസഭാ തെരഞ്ഞെടുപ്പില് മുന്നേറ്റം കുറിക്കാനൊരുങ്ങി എന്ഡിഎ സ്ഥാനാര്ത്ഥിയായി ഒന്നാം വാര്ഡ് മണ്ണൂരില് സി.ലിജിന. മട്ടന്നൂര് നഗരസഭ രൂപംകൊണ്ട് അഞ്ചാമത് തെരഞ്ഞെടുപ്പ് ആഗസ്റ്റ് 8 ന് നടക്കാനിരിക്കെ കഴിഞ്ഞ നാല് തവണയും യുഡിഎഫ് ജയിച്ചുകയറിയ നഗരസഭയിലെ ഒന്നാമത്തെ വാര്ഡായ മണ്ണൂരില് വിജയം പിടിച്ചെടുക്കാനാണ് എന്ഡിഎ മുന്നണിയിലെ ബിജെപി സ്ഥാനാര്ത്ഥിയായി സി.ലിജിന അരങ്ങത്തിറങ്ങിയിരിക്കുന്നത്. വാര്ഡിലെ വികസന പ്രശ്നങ്ങളും യുഡിഎഫിലെ ഗ്രൂപ്പ് തര്ക്കങ്ങളും ഭരണമുന്നണിക്ക് വിനയായി മാറിയിരിക്കുന്ന നിലവിലെ സാഹചര്യത്തില് തങ്ങളുടെ കരുത്തയായ സ്ഥാനാര്ത്ഥിയെയാണ് വാര്ഡ് പിടിച്ചെടുക്കാനായി ബിജെപി രംഗത്തിറക്കിയിരിക്കുന്നത്. കന്നിയങ്കമാണെങ്കിലും സാമൂഹ്യരംഗത്തെ പ്രവര്ത്തന മികവ് ജനങ്ങള് അംഗീകരിക്കുമെന്ന പ്രതീക്ഷയിലാണ് സ്ഥാനാര്ത്ഥിയും പ്രവര്ത്തകരും. മട്ടന്നൂര് നഗരസഭ എഡിഎസ് സെക്രട്ടറി, പ്രദേശത്തെ കുടുംബശ്രീ പ്രസിഡണ്ട് എന്നി നിലകളില് പ്രവര്ത്തിച്ച് മുന്പരിചയമുള്ള ലിജിനക്ക് വാര്ഡിലെ പ്രശ്നങ്ങള് പഠിച്ച് പരിഹാരം കാണാന് കഴിയുമെന്ന് വാര്ഡിലെ വോട്ടര്മാര് ഉറച്ചു വിശ്വസിക്കുന്നു. വീടുകള് തോറും കയറിയിറങ്ങി ജനങ്ങളെ നേരില്ക്കണ്ട് വോട്ട് സമാഹരിക്കുന്ന സ്ഥാനാര്ത്ഥിക്കൊപ്പം നിരവധി പ്രവര്ത്തകരാണ് പുത്തന് ആവേശവുമായി രംഗത്തുള്ളത്. യുഡിഎഫിലെ മിനി രവീന്ദ്രനും ഇടതു മുന്നണി സ്ഥാനാര്ത്ഥിയായി പി.എ.സഫീനയുമാണ് എതിരാളികളായി രംഗത്തുള്ളത്.
മണ്ണൂര് വാര്ഡ് എന്ഡിഎ സ്ഥാനാര്ത്ഥി സി.ലിജിന
