ചെര്പ്പുളശ്ശേരി: വ്യാജ ആയുര്വേദ ഡോക്ടറെ ചെര്പ്പുളശ്ശേരി പോലീസ് അറസ്റ്റ് ചെയ്തു. ചാവക്കാട് തിരുവാത്ര വലിയ പുരയ്ക്കല് കോട്ടപ്പുറത്ത് വീട്ടില് വി.കെ.അബ്ദുള് ഗഫൂര് (53) ആണ് പിടിയിലായത്.
മപ്പാട്ടുകരിയില് ദൈഷജ്യ ഭവനം എന്ന പേരില് ക്ലിനിക് നടത്തിയിരുന്ന ഇയാളില്നിന്ന് അലര്ജിക്ക് മരുന്നു വാങ്ങി കഴിച്ച ഒരാള്ക്ക് അസുഖം കൂടിയതോടെയാണ് സംഭവം പുറത്തറിഞ്ഞത്.
നാട്ടുകാര് ക്ലിനിക്കിലെത്തി ഡോക്ടറുടെ യോഗ്യത ചോദിച്ചതോടെയാണ് ഒരു സര്ട്ടിഫിക്കറ്റും ഇല്ലെന്നവിവരം അറിഞ്ഞത്. തുടര്ന്ന് ചെര്പ്പുളശ്ശേരി പോലിസില് പരാതി നല്കുകയായിരുന്നു.പരാതിയുടെ അടിസ്ഥാനത്തില് എസ്ഐ പി.എം.ലിബിയുടെ നേതൃത്വത്തില് പോലീസ് നടത്തിയ അന്വേഷണത്തിലാണ് ഇയാള് വ്യാജഡോക്ടറാണെന്ന് കണ്ടെത്തിയത്.
ഡോ.കെ.വി.അബ്ദുള് ഗഫൂര് (ബിഎഎംഎസ്) എന്ന പേരിലാണ് ഇയാള് ചികില്സ നടത്തിയിരുന്നത്
ബുധന്, വ്യാഴം, വെള്ളി, ശനി, ഞായര് ദിവസങ്ങളില് വൈകിട്ട് മൂന്നു മുതല് അഞ്ച് വരെയാണ് പ്രാക്ടീസ് നടത്തിയത്. അല് ശിഫാ എന്ന പേരിലാണ് ഇയാളുടെ സ്ഥാപനം അറിയപ്പെട്ടിരുന്നത്. കുന്നുംകുളം, ചെര്പ്പുളശ്ശേരി, പട്ടാമ്പി എന്നിവിടങ്ങളിലും പ്രാക്ടീസ് നടത്തിയതായി പോലീസ് കണ്ടെത്തി.
ആയുര്വേദ മരുന്ന് നേരത്തെ വിതരണം ചെയ്ത പരിചയത്തിലാണ് ഇയാള് പരിശോധന നടത്തിയത്. ബോര്ഡില് മറ്റൊരാളുടെ പേരുകൂടെയുണ്ടെങ്കിലും അയാള് കുവൈത്തിലാണെന്ന് അറിവായി. പാരമ്പര്യ വൈദ്യനാണെന്ന് ഇയാള് അവകാശപ്പെടുന്നുണ്ടെങ്കിലും ഇതിനുള്ള രേഖകളൊന്നും കൈവശമില്ലായിരുന്നു.
വാത രോഗം മുതല് ലൈംഗിക രോഗങ്ങള്ക്കു വരെ ചികിത്സ നടത്തുന്നുന്നുണ്ട്. ഇയാള് നടത്തുന്ന സ്ഥാപനത്തില്നിന്നു കുറെ മരുന്നുകളും ചികിത്സാ സംബന്ധമായ നോട്ടീസ് എന്നിവയും പോലീസ് പിടിച്ചെടുത്തു.
പ്രതിയെ കോടതിയില് ഹാജരാക്കി.
