കോഴിക്കോട്: ജൂനിയര് വിദ്യാര്ത്ഥിയെ ആക്രമിച്ചു പണം തട്ടാന് ശ്രമിച്ച സീരിയല് താരം പോലീസ് അറസ്റ്റ് ചെയ്തു. എം80 മൂസ എന്ന ഹാസ്യ സീരിയലിലെ പേരാമ്പ്ര മരുതോറചാലില് അതുല് ശ്രീവയെ(20) ആണ് കസബ പോലീസ് അറസ്റ്റു ചെയ്തത്. ഇയാള്ക്കെതിരെ കൊലപാതകശ്രമം ഉള്പ്പെടെയുള്ള വകുപ്പുകള് പ്രകാരമാണ് കേസ് എടുത്തിരിക്കുന്നത്. അതുല് എസ്എഫ്ഐ പ്രവര്ത്തകനാണ്.
കോഴിക്കോട് ഗുരുവായൂരപ്പന് കോളേജിലെ മൂന്നാം വര്ഷ വിദ്യാര്ത്ഥിയാണ് അതുല് ശ്രീവ. കോളേജിലെ രണ്ടാം വര്ഷ വിദ്യാര്ത്ഥിയാണ് അതുല് ശ്രീവയും സംഘവും ചേര്ന്ന് മര്ദ്ദിക്കുകയും പണം തട്ടാന് ശ്രമം നടത്തിയെന്നും കാണിച്ച് പരാതി നല്കിയത്. കഴിഞ്ഞ വെള്ളിയാഴ്ചയാണ് സംഭവം.
കോളേജിലെ ക്ഷത്രിയാസ് ഗ്യാങ്ങിലെ അംഗമാണ് അതുല് ശ്രീവയെന്ന് വിദ്യാര്ത്ഥികള് പറയുന്നു. നേരത്തെ ഒരു വിദ്യാര്ത്ഥിയെ മര്ദ്ദിച്ചതുമായി ബന്ധപ്പെട്ട കേസില് അതുല് ശ്രീവ ഹൈക്കോടതിയില് നിന്ന് മുന്കൂര്ജാമ്യം നേടിയിരുന്നു. ഇതിനിടയിലാണ് ഈ കേസില് പൊലീസ് അറസ്റ്റ് ചെയ്യുന്നത്. വിദ്യാര്ത്ഥികളെ ഭീഷണിപ്പെടുത്തി പണം തട്ടുന്നതും നല്കാന് തയ്യാറാവാത്തവരെ മര്ദ്ദിക്കുന്നതും ഇയാള് ഉള്പ്പെടുന്ന സംഘത്തിന്റെ രീതിയാണെന്ന് പോലീസ് പറയുന്നു. കേസിലെ മറ്റു പ്രതികള്ക്കുവേണ്ടി പോലീസ് അന്വേഷണം ആരംഭിച്ചിട്ടുണ്ട്.
