ചാലക്കുടി: കൊരട്ടി പഞ്ചായത്ത് യോഗത്തില് ഐക്യകണ്ഠേന പാസാക്കിയ പ്രമേയം പിന്വലിക്കുവാനുള്ള നീക്കം ബഹളത്തിനിടയാക്കി.
അടച്ചു പൂട്ടല് ഭീഷണി നേരിടുന്ന കൊരട്ടി കേന്ദ്ര സര്ക്കാര് പ്രസിന്റെ സ്ഥലത്ത് കേന്ദ്ര സര്ക്കാരിന്റെ കീഴില് ക്യാന്സര് റീജിയണല് റിസര്ച്ച് സെന്ററും ആരംഭിക്കണമെന്ന് ആവശ്യപ്പെട്ടാണ് പ്രമേയം അവതരിപ്പിച്ചിരുന്നത്. പതൊന്പതംഗങ്ങളുള്ള പഞ്ചായത്തില് ബിജെപിയംഗം ബിന്ദു സത്യപാലന് അവതരിപ്പിച്ച പ്രമേയം ഐക്യകണ്ഠേന പാസാക്കുകയായിരുന്നു.
തുടര്ന്നാണ് പ്രമേയത്തിന്റെ കോപ്പി പ്രധാന മന്ത്രിക്കും ,നഗര വികസന മന്ത്രി വെങ്കയ നായിഡ്ഡു, ആരോഗ്യ വകുപ്പ് മന്ത്രി ജെ.പി.നദ്ദ തുടങ്ങിയവര്ക്ക് അയയ്ക്കുകയും ചെയ്തത്.
മൂന്നാം വാര്ഡ് മെമ്പര് സിന്ധു ജയരാജ് ഇതിനെതിരെ പുതിയ പ്രമേയം അവതരിപ്പിക്കുകയായിരുന്നു. ഇരുപ്പത്തിയൊന്നോളം ജീവനക്കാരുടെ ജോലി പോകുമെന്നും അതിനാല് കേന്ദ്ര സര്ക്കാര്.പ്രസ് നില നിര്ത്തണമെന്നും, ബാക്കിയുള്ള സ്ഥലത്ത് വ്യവസായ സ്ഥാപനങ്ങളോ,ആതുര സേവന കേന്ദ്രങ്ങളോ ആരംഭിക്കണമെന്ന് ആവശ്യപ്പെടുകയായിരുന്നു. ഒരിക്കല് അവതരിപ്പിച്ച പ്രമേയം വീണ്ടും അവതിരിപ്പിക്കുന്നതില് പ്രതിഷേധിച്ച്. കോണ്ഗ്രസ് അംഗങ്ങള് യോഗത്തില് നിന്ന് ഇറങ്ങി പോവുകയും ബിജെപിയംഗം ബിന്ദു സത്യപാലന് വിയോജന കുറിപ്പ് രേഖപ്പെടുത്തുകയും ചെയ്തു.
