പത്തനാപുരം: പുതിയ എക്സൈസ് സര്ക്കിള് ഇന്സ്പെക്ടര് ഓഫീസ് പത്തനാപുരത്ത് പ്രവര്ത്തനമാരംഭിക്കുമെന്ന അധികൃതരുടെ വാഗ്ദാനം പാഴ്വാക്കാകുന്നു. ഏപ്രില് മാസം പ്രവര്ത്തനമാരംഭിക്കുമെന്ന് പറഞ്ഞ ഓഫീസിന്റെ നിര്മ്മാണം മാസങ്ങളായിട്ടും എങ്ങുമെത്തിയില്ല.
കല്ലുംകടവിലെ ഗ്രാമപഞ്ചായത്തിന്റെ ഉടമസ്ഥതയിലുള്ള സാംസ്കാരികനിലയത്തിലെ രണ്ടാമത്തെ നിലയമായിരുന്നു ഓഫീസിനായി തെരഞ്ഞെടുത്തിരുന്നത്. ഒരു സര്ക്കിള് ഇന്സ്പെക്ടര്, ഒരു സബ് ഇന്സ്പെക്ടര്, രണ്ട് പ്രിവന്റീവ് ഓഫീസര്മാര്, അഞ്ച് സിവില് ഓഫീസര്മാരും ഡ്രൈവറുമടക്കം പത്ത് ജീവനക്കാര് ഉണ്ടാകുമെന്നും അധികൃതര് അറിയിച്ചിരുന്നു. പഞ്ചായത്ത് അനുവദിച്ച സ്ഥലത്ത് എക്സൈസ് ഉദ്യോഗസ്ഥര് പരിശോധന നടത്തുകയും കമ്മീഷണര്ക്ക് റിപ്പോര്ട്ട് നല്കുകയും ചെയ്തിരുന്നു. രണ്ടാഴ്ചക്കുളളില് തന്നെ ഓഫീസ് മുറികളുടെ നിര്മ്മാണം നടത്തി ഏപ്രില് അവസാനത്തോടെ തന്നെ പ്രവത്തനം ആരംഭിക്കുമെന്നായിരുന്നു ആദ്യം പറഞ്ഞിരുന്നത്. എന്നാല് മാസങ്ങള് കഴിഞ്ഞിട്ടും യാതൊരുവിധ നടപടിക്രമങ്ങളും തുടങ്ങാനായിട്ടില്ല.
നിലവില് പത്തനാപുരം, പുനലൂര് താലൂക്കുകള്ക്കായി പുനലൂരിലാണ് എക്സൈസ് സര്ക്കിള് ഇന്സ്പെക്ടര് ഓഫീസ് പ്രവര്ത്തിക്കുന്നത്. പത്തനാപുരത്ത് താലൂക്ക് ആസ്ഥാനമായതോടെയാണ് പുതിയ ഓഫീസ് അനുവദിച്ചത്. പത്തനാപുരം, പിറവന്തൂര്, പട്ടാഴി വടക്കേക്കര, വിളക്കുടി, പട്ടാഴി, തലവൂര് തുടങ്ങിയ പഞ്ചായത്തുകളാകും ഓഫീസ് പരിധിയില് വരിക. വനമേഖല കൂടുതലുളള പത്തനാപുരത്ത് എക്സൈസ് സര്ക്കിള് ഓഫീസ് അനുവദിക്കണമെന്നത് പതിറ്റാണ്ടുകളായുളള ആവശ്യമായിരുന്നു. വ്യാജമദ്യ വില്പനയും ലഹരിവില്പനയും വ്യാപകമായ മലയോരമേഖലയ്ക്ക് ഏറെ ആശ്വാസം ലഭിക്കുന്നതാണ് പുതിയ എക്സൈസ് സര്ക്കിള് ഇന്സ്പെക്ടര് ഓഫീസ്. എന്നാല് പ്രഖ്യാപനം നടത്തിയിട്ടും ഓഫീസിന്റെ പ്രവര്ത്തനം ആരംഭിക്കാത്തത് ജനങ്ങളെ നിരാശരാക്കുന്നു.
