ആലപ്പുഴ: ജില്ലാ കോടതിക്കു സമീപം വീട്ടമ്മയുടെ സ്വര്ണ്ണാഭരണങ്ങളടങ്ങിയ പേഴ്സ് പിടിച്ചു പറിച്ചു. മോഷ്ടാവിനെ സമീപത്തുണ്ടായിരുന്നവര് ഓടിച്ചിട്ടു പിടികൂടി. ബീച്ച് വാര്ഡ് നെടുംപുറത്തുവീട്ടില് രാജന് (52) ആണ് പിടിയിലായത്.
ഇന്നലെ രാവിലെ 11.30ഓടെയായിരുന്നു സംഭവം. കോടതിക്ക് എതിര്വശമുള്ള പണയമിടപാടു സ്ഥാപനത്തില് സ്വര്ണം പണയം വയ്ക്കാനെത്തിയതായിരുന്നു ജില്ലാകോടതി വാര്ഡ് സ്വദേശിനിയായ വീട്ടമ്മ. പിന്നാലെ വന്ന രാജന് സ്ഥാപനത്തിനുള്ളില് കയറി പേഴ്സ് തട്ടിയെടുത്ത് ഓടുകയായിരുന്നു. നിലവിളി കേട്ട് സമീപമുണ്ടായിരുന്ന രണ്ടുപേര് പിന്നാലെ ഓടി ഇയാളെ പിടികൂടി.
വിവരമറിയിച്ചതിനെത്തുടര്ന്ന് നോര്ത്ത് സിഐയുടെ നേതൃത്വത്തില് പോലീസെത്തി സ്റ്റേഷനിലേക്ക് കൊണ്ടുപോയി. ഇയാള് ഇത്തരത്തില് നിരവധി കേസുകളിലെ പ്രതിയാണെന്ന് പോലീസ് പറഞ്ഞു. ജില്ലാകോടതി പരിസര പ്രദേശങ്ങള് പിടിച്ചുപറിക്കാരുടെയും മയക്കുമരുന്നു കഞ്ചാവ് മാഫിയകളുടെയും താവളമായിരിക്കുകയാണ്.
മുനിസിപ്പല് സത്രം കോംപ്ലക്സാണ് ഇത്തരക്കാരുടെ പ്രധാന കേന്ദ്രം. പലപ്പോഴും മയക്കുമരുന്നു ലഹരിയിലാണ് പിടിച്ചുപറി നടക്കുന്നത്. മുന്കാലങ്ങളിലും ഇത്തരം നിരവധി സംഭവങ്ങള് നടന്നിട്ടുണ്ട്.
