തിരുവനന്തപുരം: ജൂലൈ 6 മുതല് 9 വരെ ഭൂവനേശ്വറില് നടന്ന ഇരുപത്തിരണ്ടാമത് ഏഷ്യന് അത്ലെറ്റിക് ചാമ്പ്യന്ഷിപ്പില് മെഡല് നേടിയ കായിക താരങ്ങള്ക്ക് പ്രോത്സാഹനമായി കാഷ് അവാര്ഡ് നല്കാന് ഇന്ന് ചേര്ന്ന മന്ത്രിസഭായോഗം തീരുമാനിച്ചു. വ്യക്തിഗത ഇനത്തില് സ്വര്ണം നേടിയവര്ക്ക് പത്ത് ലക്ഷം രൂപയും വെളളി നേടിയവര്ക്ക് ഏഴ് ലക്ഷം രൂപയും വെങ്കലം നേടിയവര്ക്ക് അഞ്ച് ലക്ഷം രൂപയും നല്കും.
ടീമിനത്തില് സ്വര്ണ്ണം നേടിയവര്ക്ക് അഞ്ച് ലക്ഷം രൂപയും വെളളി നേടിയവര്ക്ക് 3.5 ലക്ഷം രൂപയും വെങ്കലം നേടിയവര്ക്ക് 2.5 ലക്ഷം രൂപയും അനുവദിക്കാന് തീരുമാനിച്ചു. കോഴിക്കോട് ജില്ലയില് ചെമ്പനോടയില് വില്ലേജ് ഓഫീസില് തൂങ്ങി മരിച്ച കാവില്പുരയിടത്തില് ജോയ് എന്ന കെ.ജെ. തോമസിന്റെ ബാങ്ക് വായ്പകള് തീര്ക്കുന്നതിന് മുഖ്യമന്ത്രിയുടെ ദുരിതാശ്വാസനിധിയില് നിന്ന് തുക അനുവദിക്കാന് തീരുമാനിച്ചു.
ഭൂനികുതി സ്വീകരിക്കാത്ത പ്രശ്നത്തെ തുടര്ന്നാണ് ജോയ് ആത്മഹത്യ ചെയ്തത്. ജോയിയുടെ കുടുംബത്തിന് ചക്കിട്ടപ്പാറ സഹകരണ ബാങ്കില് 13.16 ലക്ഷം രൂപയുടെ ബാധ്യതയുണ്ട്. കൂടാതെ മകള്ക്ക് വിദ്യാഭ്യാസ വായ്പയെടുത്ത വകയില് പൂഴിത്തോട് യൂണിയന് ബാങ്കില് 3.31 ലക്ഷം രൂപയുടെ ബാധ്യതയും ഉണ്ട്. ഈ രണ്ട് ബാധ്യതകളും തീര്ക്കാനുളള തുക ദുരിതാശ്വാസ നിധിയില് നിന്ന് അനുവദിക്കും. ഭൂമിയുടെ തര്ക്കം പരിഹരിച്ച് നികുതി ഈടാക്കുന്നതിന് കോഴിക്കോട് കളക്റ്ററെ ചുമതലപ്പെടുത്തി.
മഞ്ചേരി സര്ക്കാര് മെഡിക്കല് കോളേജില് പത്ത് അധ്യാപകരുടെ തസ്തികകളും കൊയിലാണ്ടി എസ്.എ.ആര്.ബി.റ്റി.എം. സര്ക്കാര് കോളേജില് ഫിസിക്സ് ലാബില് മൂന്ന് അറ്റന്ഡര് തസ്തികകളും സൃഷ്ടിക്കാന് മന്ത്രിസഭായോഗം തീരുമാനിച്ചു. കേരളത്തിലെ ഇടത്തരം-ചെറുകിട തുറമുഖങ്ങളുടെ വികസനത്തിനും ഭരണനിര്വഹണത്തിനും കേരളാ മാരിറ്റൈം ബോര്ഡ് ബില് ഓര്ഡിനന്സായി ഇറക്കുന്നതിന് ഗവര്ണറോട് ശുപാര്ശ ചെയ്യാന് തീരുമാനിച്ചു. 2014ല് നിയമസഭ പാസ്സാക്കിയ മാരിറ്റൈം ബോര്ഡ് ബില് നിയമസഭയുടെ അംഗീകാരത്തോടെ പിന്വലിച്ചിരുന്നു. ആ ബില്ലിലെ അപാകതകള് പരിഹരിച്ചാണ് പുതിയ ബില്ലിന് രൂപം നല്കിയത്.
ജി.എസ്.റ്റി. നടപ്പിലാക്കിയ സാഹചര്യത്തില് സംസ്ഥാന വാണിജ്യനികുതി വകുപ്പിന്റെ പേര് സംസ്ഥാന ചരക്ക് സേവന നികുതി വകുപ്പ് എന്നാക്കാനും തീരുമാനിച്ചു.
