ന്യൂദല്ഹി: പ്രധാന്മന്ത്രി ഫോര്മലൈസേഷന് ഓഫ് മൈക്രോ ഫുഡ് പ്രൊസസിങ് എന്റര്പ്രൈസസ് (PMFME) പദ്ധതിയുടെ ക്രെഡിറ്റ്- ലിങ്ക്ഡ് വിഭാഗത്തില് അനുവദിച്ച വായ്പകളുടെ എണ്ണം രണ്ട് ലക്ഷം കടന്നെന്ന് കേന്ദ്ര ഭക്ഷ്യ സംസ്കരണ വ്യവസായ മന്ത്രി ചിരാഗ് പാസ്വാന് വ്യക്തമാക്കി.
ഔപചാരിക വായ്പാ വിപണിയിലേക്ക് കടന്നുവരികയും ബിസിനസ് കെട്ടിപ്പടുക്കാന് യഥാര്ത്ഥ അവസരം ലഭിക്കുകയും ചെയ്ത സംരംഭകരാണ് ഇതിന് പിന്നില് എന്നതുകൊണ്ട് തന്നെ ഈ നേട്ടം ഏറെ പ്രാധാന്യമര്ഹിക്കുന്നു. ആഘോഷിക്കപ്പെടേണ്ട ഒരു നേട്ടവും, ഇത് സാധ്യമാക്കിയവരെ ആദരിക്കേണ്ട ഒരു നിമിഷവുമാണിത്, മന്ത്രി തുടര്ന്നു.
ചെലവുകുറഞ്ഞ വായ്പകള്, ആധുനിക സാങ്കേതികവിദ്യ, ഗുണനിലവാര സര്ട്ടിഫിക്കേഷന്, വിപണികളിലേക്കുള്ള പ്രവേശനം എന്നിവയുടെ അഭാവമായിരുന്നു പലരും നേരിട്ടിരുന്ന പ്രധാന വെല്ലുവിളി. ഇതെല്ലാം പരിഹരിക്കാനാണ് പിഎംഎഫ്എംഇ പദ്ധതി രൂപകല്പ്പന ചെയ്തത്. ഈ മാറ്റത്തിന്റെ പ്രധാന വക്താക്കള് സ്ത്രീകളാണ്. അനുവദിച്ച രണ്ട് ലക്ഷം വായ്പകളില് ഏകദേശം 44 ശതമാനവും ലഭിച്ചത് സ്ത്രീകള് നയിക്കുന്ന സംരംഭങ്ങള്ക്കാണ്. നാല് ലക്ഷത്തിലധികം സ്വയംസഹായ സംഘാംഗങ്ങള്ക്ക് ബിസിനസ് ശക്തമാക്കുന്നതിനും മെച്ചപ്പെടുത്തുന്നതിനുമായി സീഡ് ക്യാപിറ്റല് ലഭിച്ചു. ഈ പദ്ധതി 20,300 കോടിയിലധികം രൂപയുടെ നിക്ഷേപം ആകര്ഷിക്കുകയും ഏകദേശം ആറ് ലക്ഷത്തോളം ഉപജീവന അവസരങ്ങള് സൃഷ്ടിക്കുകയും ചെയ്തു. 75,000ത്തിലധികം യൂണിറ്റുകള് ഔപചാരിക സമ്പദ്വ്യവസ്ഥയിലേക്ക് കടന്നുവന്നെന്നും ചിരാഗ് പാസ്വാന് വിശദീകരിച്ചു.
