കൊല്ലം: നിറഞ്ഞുപെയ്ത മഴയോടെ ബാലഗോകുലം സംസ്ഥാനസമ്മേളനത്തിന് പതാക ഉയര്ന്നു. പാളയില് തീര്ത്ത ബാഡ്ജും പച്ച പുതച്ച ബാഗുമായി പ്രതിനിധികള്. വേദിയില് പനമ്പില് തീര്ത്ത പീഠത്തില് ശ്രീകൃഷ്ണവിഗ്രഹം. തുണിയില് കലാവിരുതുകള് സൃഷ്ടിച്ച രംഗവേദി. പ്രകൃതി സംസ്കൃതി രാഷ്ട്രം എന്ന മുദ്രാവാക്യത്തിന്റെ പ്രായോഗികരൂപമായിരുന്ന സമ്മേളനവേദി.
മണ്ണിനെയും പ്രകൃതിയെയും സംരക്ഷിക്കാനുള്ള കൃഷ്ണസന്ദേശമാണ് ബാലഗോകുലം സമാജത്തില് പ്രാവര്ത്തികമാക്കുന്നതെന്ന് ഉദ്ഘാടനസഭയില് അദ്ധ്യക്ഷത വഹിച്ച ബാലഗോകുലം സംസ്ഥാന അദ്ധ്യക്ഷന് കെ.പി.ബാബുരാജന് മാസ്റ്റര് പറഞ്ഞു.
ഓരോ ബാലഗോകുലവും വൃന്ദാവനത്തെ മാതൃകയാക്കണം. അടിച്ചേല്പ്പിക്കപ്പെടുന്ന വിദ്യാഭ്യാസത്തില് പ്രകൃതിയും സംസ്കൃതിയുമില്ല. അവയെ ജീവിതത്തിന്റെ ഭാഗമാക്കുന്ന ദര്ശനമാണ് ഗോകുലം മുന്നോട്ടുവെയ്ക്കുന്നത്.
ബാലഗോകുലം വിഭാവനം ചെയ്യുന്ന അന്താരാഷ്ട്രശ്രീകൃഷ്ണകേന്ദ്രം അതിന്റെ ഭാഗമാണെന്ന് അദ്ദേഹം ചൂണ്ടിക്കാട്ടി. കുട്ടികളുടെ സുരക്ഷയ്ക്ക് ബാലഗോകുലം മുന്തിയ പരിഗണന നല്കുന്നുണ്ട്. കുട്ടിത്തം ഇല്ലാതാക്കി കുറേ യന്ത്രങ്ങളെ നിര്മ്മിക്കുന്ന വിദ്യാഭ്യാസരീതി മാറണം. ബാല്യത്തെ വീണ്ടെടുക്കാന് കുട്ടികള്ക്ക് പ്രകൃതിയെയും മണ്ണിനെയും മടക്കിനല്കാനാകണമെന്ന് അദ്ദേഹം ഓര്മ്മിപ്പിച്ചു.
സമ്മേളനം ഇന്ന് ജില്ലയിലെ ബാലപ്രതിഭകളെ അനുമോദിക്കും. അനുമോദനസഭയില് ചലച്ചിത്രതാരം അനുശ്രീ പങ്കെടുക്കും. ഗുരൂപൂജാ ദിവസമായ ഇന്ന് പ്രൊഫ:പൊന്നറ സരസ്വതിക്ക് കുട്ടികള് ഗുരുപൂജ ചെയ്യും. സമ്മേളനം ഇന്ന് സമാപിക്കും.
