കട്ടപ്പന: ഇടവിട്ട് മഴ എത്തിയതോടെ ഹൈറേഞ്ചിലേക്കുള്ള അറബ് വിനോദസഞ്ചാരികളുടെ വരവ് വര്‍ദ്ധിച്ചു. ഹൈറേഞ്ചിലെ പ്രധാന വിനോദസഞ്ചാര കേന്ദ്രമായ ശ്രീനാരായണപുരത്തും നിരവധി സഞ്ചാരികളാണ് എത്തുന്നത്.
മണ്‍സൂണ്‍ കാലത്തെ മഞ്ഞും തണുപ്പും ആസ്വദിക്കുന്നതിനായി ഇത്തവണയും ആയിരക്കണക്കിന് സഞ്ചാരികളാണ് ജില്ലയിലേയ്‌ക്ക് എത്തുന്നത്. ഇതോടെ മണല്‍കാറ്റിന്റെ ചൂടില്‍ നിന്നും ഹൈറേഞ്ചിന്റെ കുളിരുതേടിയെത്തുവരുടേയും എണ്ണത്തില്‍ വന്‍ വര്‍ദ്ധനവാണ് ഉണ്ടായിരിക്കുന്നത്. ആരെയും ആകര്‍ഷിക്കുന്ന അഞ്ച് വെള്ളച്ചാട്ടങ്ങളും മലനിരകളുടെ വിദൂരകാഴ്‌ച്ചകളും കൊണ്ട് സമൃദ്ധമായ ശ്രീനാരായണപുരം റിപ്പിള്‍ വാട്ടര്‍ഫാള്‍സ് കാണുന്നതിന് വേണ്ടി ദിവസേന നൂറ്കണക്കിന് സഞ്ചാരികളാണ് എത്തിക്കൊണ്ടിരിക്കുന്നത്.
കുത്തിയൊഴുകിയെത്തുന്ന മുതിരപ്പുഴയാറിന്റെ തേക്കിന്‍കാനം മുതല്‍ ശ്രീനാരായണപുരം വരെയുള്ള പ്രദേശത്താണ് അഞ്ചോളം വെള്ളച്ചാട്ടങ്ങള്‍ സജീവമായിട്ടുള്ളത്. കടുത്ത വേനലില്‍ നീരുറവ വറ്റി വെള്ളച്ചാട്ടങ്ങള്‍ അപ്രതിക്ഷമാകുകയും ചെയ്തതോടെ ഇവിടേയ്‌ക്കുള്ള സഞ്ചാരികളുടെ കടന്നുവരവും നിലച്ചിരുന്നു. ഇതിന് ശേഷം കാലവര്‍ഷം സജീവമായി മുതിരപ്പുഴയാറ് ജലസമൃദ്ധമാകുകയും വെള്ളച്ചാട്ടങ്ങള്‍ ജലസമൃദ്ധവമാകുകയും ചെയ്തതോടെയാണ് നിലവില്‍ മണ്‍സൂണ്‍ ആസ്വദിക്കുന്നതിനായി സഞ്ചാരികളുടെ കടന്നുവരവ് വര്‍ദ്ധിച്ചിരിക്കുന്നത്. എപ്പോഴുമുള്ള തണുത്ത കാലാവസ്ഥയും പൊന്മുടി ജലാശത്തിന്റെ ഇരുവശങ്ങളിലായി ഉയര്‍ന്ന് നില്‍ക്കുന്ന വലിയ മലനിരകളുടെ വിദൂര കാഴ്‌ച്ചകളുമാണ് സഞ്ചാരികളെ ഇവിടേയ്‌ക്ക് ആകര്‍ഷിക്കുവാനുള്ള പ്രധാന കാരണം.
മുന്‍ വര്‍ഷത്തെ അപേക്ഷിച്ച് ഇത്തവണ വിനോദ സഞ്ചാരികളുടെ എണ്ണത്തില്‍ കാര്യമായ വര്‍ദ്ധനയുണ്ടായിട്ടുണ്ടെന്നും അറബ് സഞ്ചാരികളാണ് കൂടുതലായി എത്തുന്നതെന്നും ശ്രീനാരായണപുരത്തെ ജീവനക്കാര്‍ പറഞ്ഞു. ആരെയും ആകര്‍ഷിക്കുന്ന അനുയോജ്യമായ കാലവസ്ഥയും പ്രകൃതി മനോഹാരിതയും ആസ്വദിച്ച് മണിക്കൂറുകള്‍ ചിലവഴിച്ചതിന് ശേഷമാണ് സഞ്ചാരികള്‍ ഇവിടെ നിന്നും മടങ്ങുന്നത്.
