കാഞ്ഞിരപ്പള്ളി: കാഞ്ഞിരപ്പള്ളി മിനി സിവില് സ്റ്റേഷന് പരിസരത്തെ അനധികൃത പാര്ക്കിങ്ങിനെതിരെ നടപടി സ്വീകരിക്കുമെന്ന് തഹസില്ദാര് ജോസ് ജോര്ജ് അറിയിച്ചു. മിനിസിവില് സ്റ്റേഷന് പരിസരത്ത് വാഹനങ്ങള് പാര്ക്ക് ചെയ്ത ശേഷം ദൂരയാത്രയ്ക്കായി പോകുന്നവരുമുണ്ട്. കൂടാതെ ടൗണിലെത്തുന്നവര് സിവില് സ്റ്റേഷന് വളപ്പില് വാഹനം പാര്ക്ക് ചെയ്ത ശേഷം കച്ചവടസ്ഥാപനങ്ങളിലും മറ്റ് വിവിധ ആവശ്യങ്ങള്ക്കും പോകുന്നതായി ശ്രദ്ധയില്പ്പെട്ടതോടെയാണ് അധികൃതര് നടപടികള് സ്വീകരിച്ചു തുടങ്ങിയത്.
സര്ക്കാര്വാഹനങ്ങളും, സിവില് സ്റ്റേഷനിലെ ഓഫിസുകളില് ജോലി ചെയ്യുന്ന ജീവനക്കാര്ക്കും, ഇവിടെ വിവിധ ആവശ്യങ്ങള്ക്ക് എത്തുന്നവര്ക്കും വാഹനങ്ങള് പാര്ക്ക് ചെയ്യാന് ഇടമില്ലാതായതായും അധികൃതര് അറിയിച്ചു. അനധികൃതമായി പാര്ക്ക് ചെയ്യുന്ന വാഹനങ്ങളില് പാര്ക്കിങ് നിരോധിച്ചുകൊണ്ടുള്ള നോട്ടിസ് കഴിഞ്ഞ ദിവസം മുതല് പതിപ്പിച്ചു തുടങ്ങി. അനധികൃത പാര്ക്കിങ് തുടര്ന്നാല് വാഹനങ്ങള്ക്കെതിരെ നടപടി സ്വീകരിക്കുമെന്നും തഹസില്ദാര് അറിയിച്ചു.
