വാണിമേല്‍: അച്ഛനുറങ്ങുന്ന മണ്ണില്‍ മകന്റെ പുസ്തകസമര്‍പ്പണം. പുസ്തക പ്രകാശനം ചെയ്തത് അമ്മയും. 1997 ജൂലായ് 29ന് സിപിഎം അക്രമികള്‍ കൊലചെയ്ത വാണിമേല്‍ ഭൂമിവാതുക്കല്‍ പി.എം. ഭാസ്‌കരന്‍ മാസ്റ്ററുടെ ബലികുടീരത്തിലാണ് അപൂര്‍വ്വമായ പുസ്തകപ്രകാശന ചടങ്ങ് നടന്നത്. ഭാസ്‌കരന്‍ മാസ്റ്ററുടെ മകനും അധ്യാപകനുമായ ശ്രീജിത്ത് മുത്തേടത്തിന്റെ നാലാമത് പുസ്തകമായ ആഫ്രിക്കന്‍ തുമ്പികള്‍ എന്ന നോവലിന്റെ പ്രകാശനമാണ് ഇന്നലെ നടന്നത്. ശ്രീജിത്തിന്റെ അമ്മ ഒ.കെ. നളിനി പുസ്തകം പ്രകാശനം ചെയ്തു.
”പ്രസാധകരും സുഹൃത്തുക്കളും പുസ്തകപ്രകാശനത്തിന് പലയിടങ്ങളും നിര്‍ദ്ദേശിച്ചിരുന്നു. എന്നാല്‍ അച്ഛന്റെ ചാരത്ത് നിന്ന് അമ്മയുടെ കൈയില്‍ പുസ്തകം നല്‍കണമെന്നത് എന്റെ ആഗ്രഹമായിരുന്നു. എന്നിലെ എഴുത്തുകാരന് ജീവന്‍ നല്‍കിയത് അച്ഛന്റെ ഗ്രന്ഥശേഖരമാണ്. അച്ഛന്റെ ഓര്‍മ്മകള്‍ക്ക് മുമ്പില്‍ എനിക്ക് സമര്‍പ്പിക്കാനുള്ളത് ഇത് മാത്രമാണ്” പുസ്തകപ്രകാശന ചടങ്ങില്‍ പങ്കെടുത്ത് ശ്രീജിത്ത് മൂത്തേടത്ത് പറഞ്ഞു.
ശ്രീജിത്തിന്റെ അധ്യാപകനും എഴുത്തുകാരനുമായ എം.എ. വാണിമേല്‍ പുസ്തകം ഏറ്റുവാങ്ങി. ഭാസ്‌കരന്‍ മാസ്റ്ററുടെ ബലിദാന ദിനാചരണത്തിന്റെ ഭാഗമായി നടന്ന അനുസ്മരണ സമ്മേളനത്തിന് ശേഷമാണ് പുസ്തകപ്രകാശനം നടന്നത്. മയില്‍പ്പീലി പത്രാധിപര്‍ സി.കെ. ബാലകൃഷ്ണന്‍, യുവമോര്‍ച്ച സംസ്ഥാന സെക്രട്ടറി സി.ആര്‍. പ്രഫുല്‍കൃഷ്ണന്‍, എം.അച്യുതന്‍, സജീവന്‍ രയരോത്ത് എന്നിവര്‍ സംസാരിച്ചു. ജന്മഭൂമി ബ്യൂറോചീഫ് എം. ബാലകൃഷ്ണന്‍ അധ്യക്ഷത വഹിച്ചു.
അനുസ്മരണ സമ്മേളനത്തില്‍ യുവമോര്‍ച്ച സംസ്ഥാന ജനറല്‍സെക്രട്ടറി സി.ആര്‍ പ്രഫുല്‍കൃഷ്ണന്‍ സംസാരിച്ചു. മാമ്പറ്റ ബാലന്‍, കെ.ടി.കെ. ചന്ദ്രന്‍, പി. മധുപ്രസാദ് എന്നിവര്‍ പങ്കെടുത്തു.
