സിഡ്നി: ആസ്ട്രേലിയയിലെ ഏഴു ശതമാനം കത്തോലിക്ക പുരോഹിതര് കുട്ടികളെ ലൈംഗികമായി പീഡിപ്പിച്ചതായി അന്വേഷണ റിപ്പോര്ട്ട്. 1950 മുതല് 2010 വരെയുള്ള കാലത്ത് വിവിധ സ്ഥാപനങ്ങളില് കുട്ടികള്ക്കെതിരെ നടന്ന ലൈംഗികചൂഷണങ്ങളെക്കുറിച്ച് റോയല് കമ്മീഷന് നടത്തിയ അന്വേഷണ റിപ്പോര്ട്ടിലാണ് ഞെട്ടിക്കുന്ന വിവരമുള്ളത്.
രാജ്യത്തെ 40 ശതമാനത്തിലധികം ക്രിസ്ത്യന് പള്ളികള്ക്കെതിരെ ലൈംഗിക ചൂഷണ ആരോപണങ്ങളുണ്ടെന്ന് റിപ്പോര്ട്ടില് പറയുന്നു. 1980നും 2015നുമിടക്ക് ആയിരത്തിലധികം കത്തോലിക്ക സ്ഥാപനങ്ങളിലായി 4,444 കുട്ടികള് ലൈംഗികചൂഷണത്തിന് ഇരകളായതായാണ് കമ്മീഷന്റെ കണ്ടെത്തല്.
ചൂഷണത്തിനിരയായ പെണ്കുട്ടികളുടെ ശരാശരി പ്രായം 10.5 വയസ്സും ആണ്കുട്ടികളുടേത് 11.5 വയസ്സുമാണ്. മതസ്ഥാപനങ്ങള് അല്ലാത്തവയില് നടന്ന ചൂഷണങ്ങള്ക്കെതിരെയും കമ്മീഷന് അന്വേഷണം നടത്തുന്നുണ്ട്.
പീഡനം നടന്നെന്ന പരാതികള് രൂപതകള് വളരെ ലാഘവത്തോടെയാണ് കൈകാര്യം ചെയ്തതെന്നും, കുറ്റാരോപിതരെ സ്ഥലം മാറ്റുക മാത്രമാണ് ശിക്ഷാ നടപടിയായി കൈക്കൊണ്ടതെന്നും കമ്മീഷന് വിലയിരുത്തി.
1900 കുറ്റവാളികളെ ഇതുവരെ കണ്ടെത്തി. കുറ്റക്കാരായ 500 പേരെ ഇതുവരെയും തിരിച്ചറിയാനായിട്ടില്ലെന്നും റിപ്പോര്ട്ടില് സൂചിപ്പിക്കുന്നുണ്ട്്.
