ചെറുപുഴ: മലയോര മേഖലയിലെ എറ്റവും പ്രധാന റോഡായ ചെറുപുഴ-തിരുമേനി റോഡ് തകര്ന്ന് റോഡ് കുണ്ടും കുഴികളുമായി യാത്ര ചെയ്യാന് കഴിയാത്ത അവസ്ഥയിലായി. കുഴികളില് വെള്ളം നിറഞ്ഞതിന്റെ ഫലമായി ചെറുവാഹനങ്ങള് ഈ കുഴികളില് വീണ് അപകടം സംഭവിക്കുന്നത് നിത്യസംഭവമാവുകയാണ്. അപകടങ്ങള്ക്കൊപ്പം വാഹനങ്ങള്ക്ക് അറ്റകുറ്റപണി നടത്താന് പോലും വരുമാനമില്ലാതെ കഷ്ടപ്പെടുന്ന ഓട്ടോ ടാക്സി തൊഴിലാളികള് ഈ റോഡിലൂടെ ഓട്ടം പോകാന് മടിക്കുകയാണ്. ഇങ്ങനെ പോയാല് ഓട്ടം നിര്ത്തുമെന്നാണ് ബസുടമകള് ഉള്പ്പെടെയുള്ള വാഹന ഉടമകള് പറയുന്നത്. എട്ട് കിലോമീറ്റര് പൂര്ണ്ണമായും തകര്ന്ന റോഡ് കഴിഞ്ഞ പത്ത് വര്ഷമായി യാതൊരു അറ്റകുറ്റപ്പണിയും നടത്തിയിട്ടില്ല.
ഇരുപതോളം ബസുകളും നൂറുകണക്കിന് ഓട്ടോ ടാക്സി വാഹനങ്ങളും സര്വ്വീസ് നടത്തുന്ന ഈ റോഡ് കിഫ്ബി പദ്ധതിയില് ഉള്പ്പെടുത്തി മെക്കാഡം ടാറിംഗ് നടത്തുന്നതിനായുള്ള പ്രാരംഭ പ്രവര്ത്തനങ്ങള് ആരംഭിച്ചിരുന്നു. ഇതിന്റെ ഭാഗമായി റോഡിലെ കുഴികള് നികത്തുന്നതിന് പതിനഞ്ച് ലക്ഷം രൂപയും അനുവദിച്ചു. എന്നാല് കരാറുകാരന് ക്വാറികളിലെ ചില കുഴികളില് കല്ലും മണ്ണും മാത്രമിട്ട് ജനങ്ങളെ പറ്റിക്കുകയായിരുന്നു. ഈ മണ്ണും പൊടിയും കനത്ത മഴയില് ഒഴുകിപ്പോയതോടെ പതിനഞ്ച് ലക്ഷം വെള്ളത്തിലായി. നിരവധി സ്ക്കൂള് വാഹനമുള്പ്പെടെ കടന്നുപോകുമ്പോള് വീതിയില്ലാത്ത റോഡില് ഗുരുതരമായ അപകടങ്ങള് സംഭവിച്ചാല് മാത്രമെ കണ്ണു തുറക്കൂ എന്ന നിലപാടാണ് അധികൃതര്ക്ക്.
