ആഴ്സണലിനെ തകര്ത്ത ബയേണ് താരങ്ങളുടെ ആഹ്ലാദം
മാഡ്രിഡ്: യുവേഫ ചാമ്പ്യന്സ് ലീഗ് ഫുട്ബോളില് നിലവിലെ ചാമ്പ്യന്മാരായ റയല് മാഡ്രിഡും മുന് ചാമ്പ്യന്മാരായ ബയേണ് മ്യൂണിക്കും ക്വാര്ട്ടറിലെത്തി. റയല് നാപ്പൊളിയെയും ബയേണ് ആഴ്സണലിനെയും തകര്ത്താണ് അവസാന എട്ടിലേക്ക് കുതിച്ചത്.
പീരങ്കി തകര്ത്ത് ബയേണ്
ലണ്ടനിലെ എമിറേറ്റ്സ് സ്റ്റേഡിയത്തില് നടന്ന പോരാട്ടത്തില് ആഴ്സണലിനെ തകര്ത്തു തരിപ്പണമാക്കിയാണ് ബയേണ് മ്യൂണിക്ക് അടുത്ത റൗണ്ടിലേക്ക് കുതിച്ചത്. ഒന്നിനെതിരെ അഞ്ച് ഗോളുകള്ക്കായിരുന്നു ഇന്നലെ പുലര്ച്ചെ സമാപിച്ച രണ്ടാം പാദ പ്രീ ക്വാര്ട്ടറില് ബയേണിന്റെ വിജയം. മ്യൂണിക്കില് നടന്ന ആദ്യ പാദത്തിലും ഇതേ മാര്ജിനില് വിജയിച്ച ബയേണ് ഇരുപാദങ്ങളിലുമായി 10-2ന്റെ തകര്പ്പന് വിജയമാണ് നേടിയത്. ഇതോടെ തുടര്ച്ചയായ ഏഴാം തവണയും ആഴ്സണല് ക്വാര്ട്ടര് കാണാതെ പുറത്തുപോയി. ചാമ്പ്യന്സ് ലീഗിന്റെ ചരിത്രത്തില് ഒരു ഇംഗ്ലീഷ് ക്ലബ് നേരിടുന്ന ഏറ്റവും വലിയ തോല്വിയാണ് ആഴ്സണലിന്റേത്. കൂടാതെ സ്വന്തം ഗ്രൗണ്ടില് 1998നുശേഷം ആഴ്സണലിന്റെ ഏറ്റവും കനത്ത രണ്ടാമത്തെ പരാജയമായി ഇത്. ഒപ്പം ഇരുപാദ നോക്കൗട്ട് റൗണ്ടിലെ ഏറ്റവും മികച്ച രണ്ടാമത്തെ വിജയമാണ് ബയേണ് നേടിയത്. 2009-10ലെ ഇരുപാദ പ്രീ ക്വാര്ട്ടറില് ബയേണ് 12-1ന് സ്പോര്ട്ടിങ് ലിസ്ബണെ തകര്ത്തതാണ് ഏറ്റവും വലിയ വിജയം.
ഇന്നലെ സ്വന്തം തട്ടകത്തില് ഒരു ഗോളിന് മുന്നിട്ടുനിന്നശേഷമായിരുന്നു ആഴ്സണല് അപ്രതീക്ഷിതമായി തകര്ന്നടിഞ്ഞത്. ബയേണിനായി അര്ടുറോ വിദാല് രണ്ട് ഗോളുകള് നേടി. റോബര്ട്ടോ ലെവന്ഡോവ്സ്കി, ആര്യന് റോബന്, ഡഗ്ലസ് കോസ്റ്റ എന്നിവര് മറ്റ് സ്കോറര്മാര്. തിയോ വാല്ക്കോട്ടാണ് ആഴ്സണലിനായി ലക്ഷ്യം കണ്ടത്.
പന്തടക്കത്തിലും ഷോട്ടുകള് പായിക്കുന്നതിലും മുന്നിട്ടുനിന്നത് ബയേണ് താരങ്ങളായിരുന്നു. തുടക്കത്തില് ഇരുടീമുകളും മികച്ച ചില അവസരങ്ങള് സൃഷ്ടിച്ചെങ്കിലും അതൊന്നും ലക്ഷ്യത്തിലെത്തിയില്ല. ഒടുവില് ഇരുപതാം മിനിറ്റില് ആഴ്സണല് ലീഡ് നേടി. ഒളിവര് ഗിറൗഡിന്റെ പാസ് സ്വീകരിച്ച് ബോക്സില് പ്രവേശിച്ചശേഷം തിയോവാല്ക്കോട്ട് ഏറെക്കുറെ ബുദ്ധിമുട്ടേറിയ ആംഗിളില് നിന്ന് പായിച്ച ഷോട്ടാണ് ബയേണ് ഗോളി മാനുവല് ന്യുയറെ മറികടന്ന് വലയില് കയറിയത്. ലീഡ് വഴങ്ങിയതോടെ ബയേണ് ആക്രമണം കനപ്പെടുത്തി. റോബനും ലെവന്ഡോവ്സ്കിയും ഉള്പ്പെട്ട താരനിര ആഴ്സണല് പ്രതിരോധത്തെ പലതവണ കീറിമുറിച്ചെങ്കിലും സമനില ഗോള് വിട്ടുനിന്നു. ഇതോടെ ആദ്യപകുതിയില് ആഴ്സണല് 1-0ന് മുന്നില്.
എന്നാല് രണ്ടാം പകുതിയില് കണ്ടത് ബയേണിന്റെ സര്വാധിപത്യം. 54 മിനിറ്റില് ആഴ്സണലിന്റെ പ്രതിരോധതാരം ലോറന്റെ കോസിനി ചുവപ്പ് കാര്ഡ് പുറത്തായി. തുടര്ന്ന് ലഭിച്ച പെനാല്റ്റി പോളിഷ് സൂപ്പര്താരം റോബര്ട്ടോ ലെവന്ഡോവ്സ്കി വലയിലെത്തിച്ച് ടീമിന് സമനിലഗോള് സമ്മാനിച്ചു. 64-ാം മിനിറ്റില് റോബര്ട്ടോ ലെവന്ഡോവ്സ്കിയുടെ തകര്പ്പന് ഷോട്ട് ആഴ്സണല് ഗോളി ഉജ്ജ്വലമായി രക്ഷപ്പെടുത്തി. എന്നാല് നാല് മനിറ്റിനുശേഷം 68 മിനിറ്റില് ആര്യന് റോബന് ബയേണിന്റെ ലീഡുയര്ത്തി. ആഴ്സണല് പ്രതിരോധത്തിന്റെയും ഗോളിയുടെയും പിഴവ് മുതലെടുത്താണ് റോബന് വല കുലുക്കിയത്. 78-ാം മിനിറ്റില് ഡഗ്ലസ് കോസ്റ്റയിലൂടെ ബയേണ് വീണ്ടും ലീഡ് ഉയര്ത്തി. പിന്നീട് 80, 85 മിനിറ്റുകളില് അര്ടുറോ വിദാലും ലക്ഷ്യം കണ്ടതോടെ ഗണ്ണേഴ്സിന്റെ തകര്ച്ച പൂര്ണ്ണമായി.
നാപ്പൊളിയെ തകര്ത്ത് റയല്
ഇറ്റാലിയന് കരുത്തരായ നാപ്പൊളിയെ അവരുടെ തട്ടകത്തില് ചെന്ന് തകര്ത്താണ് റയല് അവസാന എട്ടിലേക്ക് കുതിച്ചത്. ആദ്യ പാദത്തിലെന്നപോലെ ഒന്നിനെതിരെ മൂന്ന് ഗോളുകള്ക്കായിരുന്നു രണ്ടാം പാദത്തിലും റയലിന്റെ വിജയം. ഇരുപാദങ്ങളിലുമായി 6-2ന്റെ ജയം. ഇതോടെ തുടര്ച്ചയായ ഏഴാം തവണയാണ് റയല് ചാമ്പ്യന്സ് ലീഗ് ഫുട്ബോളിന്റെ ക്വാര്ട്ടറില് ഇടംപിടിക്കുന്നത്. ആദ്യപാദത്തിലെന്നപോലെ രണ്ടാം പാദത്തിലും പിന്നില് നിന്ന് തിരിച്ചുവന്നാണ് റയല് ജയം നേടിയത്. ജയത്തോടെ 12 യൂറോപ്യന് മത്സരങ്ങളില് തോല്വി വഴങ്ങാതിരുന്ന റയല് മാഡ്രിഡ് പുതിയ റെക്കോര്ഡും സൃഷ്ടിച്ചു.
പന്തടക്കത്തില് നാപ്പൊളി നേരിയ മുന്തൂക്കം നിലനിര്ത്തിയതൊഴിച്ചാല് കളിയില് ഏറെക്കുറെ മുന്തൂക്കം റയലിനായിരുന്നു. എന്നാല് കളിയുടെ ഗതിക്കെതിരായി 24-ാം മിനിറ്റില് നാപ്പൊളി മുന്നിലെത്തി. മാരെക് ഹാംസിക്കിന്റെ പാസില് നിന്ന് ഡ്രൈസ് മെര്റ്റന്സ് പായിച്ച ഇടംകാലന് ഷോട്ടാണ് റയല് വലയില് കയറിയത്. തൊട്ടുപിന്നാലെ ലീഡ് ഉയര്ത്താനുള്ള മറ്റൊരു അവസരം ഇന്സിഗ്നെ നഷ്ടമാക്കി. 29-ാം മിനിറ്റില് ക്രിസ്റ്റിയാനോയുടെ ഷോട്ട് പോസ്റ്റില്ത്തട്ടി തെറിച്ചു. 37-ാം മിനിറ്റില് മെര്റ്റന്സിന്റെ ഷോട്ടും പോസ്റ്റില്ത്തട്ടി മടങ്ങി. 41-ാം മിനിറ്റില് ഹാംസിക്കിന്റെ ഷോട്ട് റയല് ഗോളി രക്ഷപ്പെടുത്തിയതോടെ ആദ്യപകുതിയില് നാപ്പൊളി 1-0ന് മുന്നില്.
എന്നാല് രണ്ടാം പകുതിയില് കളി മാറി. തുടര്ച്ചയായ മുന്നേറ്റങ്ങള്ക്കൊടുവില് 51-ാം മിനിറ്റില് റയല് സെര്ജിയോ റാമോസിലൂടെ സമനില പിടിച്ചു.
ടോണി ക്രൂസ് എടുത്ത കോര്ണര് കിക്കിന് തലവച്ച റാമോസ് തന്റെ പതിവ് ആവര്ത്തിച്ചു സമനില ഗോള് നേടി. ഇതേ രീതിയില് തന്നെയുള്ള മറ്റൊരു ഗോളിലൂടെ റാമോസ് റയലിന് ലീഡ് നല്കി. ആ ഹെഡ്ഡര് ക്ലിയര് ചെയാന് മെര്റ്റന്സ് ശ്രമിച്ചെങ്കിലും പന്ത് നാപ്പോളി വലയിലെത്തിയിരുന്നു. ലീഡ് നേടിയതോടെ നാപ്പോളിക്ക് കാര്യമായ അവസരങ്ങള് നല്കാന് റയല് തയ്യാറായില്ല. ഇഞ്ചുറി സമയത്തിന്റെ ആദ്യമിനിറ്റില് ക്രിസ്റ്റിയാനോയൂടെ ഷോട്ട് നാപ്പോളി ഗോളി പെപെ റെയ്ന തടുത്തെങ്കിലും മികച്ചൊരു റീബൗണ്ട് ഷോട്ടിലൂടെ ആല്വാറോ മൊറാട്ട റയലിന്റെ മൂന്നാം ഗോള് നേടി.
