കാര്ഡിഫ്: ചാമ്പ്യന്സ് ട്രോഫി ക്രിക്കറ്റില് ആദ്യ സെമിഫൈനല് ഇന്ന്. സോഫിയ ഗാര്ഡന്സില് നടക്കുന്ന മത്സരത്തില് ആതിഥേയരായ ഇംഗ്ലണ്ട് പാക്കിസ്ഥാനെ നേരിടും. നാളെ നടക്കുന്ന രണ്ടാം സെമിയില് ഇന്ത്യക്ക് എതിരാളികള് ബംഗ്ലാദേശ്.്വ
തുടര്ച്ചയായ രണ്ടാം ഫൈനല് ലക്ഷ്യമിട്ടാണ് ഇംഗ്ലണ്ട് ഇന്ന് ഇറങ്ങുന്നത്. അതേസമയം പാക്കിസ്ഥാന് കന്നി ഫൈനലും. ഗ്രൂപ്പ് എയിലെ മൂന്ന് മത്സരങ്ങളും വിജയിച്ചാണ് ഇംഗ്ലണ്ട് അവസാന നാലില് കയറിയത്. ആദ്യ മത്സരത്തില് ബംഗ്ലാദേശിനെ എട്ട് വിക്കറ്റിനും രണ്ടാം കളിയില് ന്യൂസിലാന്ഡിനെ 87 റണ്സിനും അവസാന മത്സരത്തില് ഓസ്ട്രേലിയയെ മഴ നിയമത്തിന്റെ അടിസ്ഥാനത്തില് 40 റണ്സിനും ഇംഗ്ലണ്ട് തോല്പ്പിച്ചു.
പാക്കിസ്ഥാന് ഗ്രൂപ്പില് ബിയില് ഇന്ത്യക്ക് പിന്നില് രണ്ടാം സ്ഥാനക്കാരായാണ് സെമിയിലെത്തിയത്. കളിച്ച മൂന്നില് രണ്ടെണ്ണം ജയിച്ചപ്പോള് ഒന്നില് തോറ്റു. ആദ്യ മത്സരത്തില് ഇന്ത്യയോട് മഴനിയമത്തിന്റെ അടിസ്ഥാനത്തില് 124 റണ്സിന് തോറ്റു. രണ്ടാം കൡയില് മഴനിയമത്തിന്റെ അടിസ്ഥാനത്തില് ദക്ഷിണാഫ്രിക്കയെ 19 റണ്സിനും അവസാന മത്സരത്തില് ശ്രീലങ്കയെ മൂന്ന് വിക്കറ്റിനും പരാജയപ്പെടുത്തി.
ഫോം വെച്ചുനോക്കിയാല് പാക്കിസ്ഥാന് ഇംഗ്ലണ്ടിനെ അട്ടിമറിക്കാനുള്ള സാധ്യത വിരളമാണ്. എന്നാല് പ്രവചനങ്ങള്ക്കതീതരായ പാക്കിസ്ഥാന് തങ്ങളുടേതായ ദിനത്തില് ഏത് വമ്പന്മാരേയും കീഴടക്കാന് കഴിവുള്ളവരാണ്. ബാറ്റ്സ്മാന്മാരുടെ ഫോമില്ലായ്മയാണ് അവരെ കുഴക്കുന്നത്. അസ്ഹര് അലി, മുഹമ്മദ് ഹഫീസ്, ഷൊഐബ് മാലിക്ക്, സര്ഫ്രാസ് അഹമ്മദ്, ബാബര് അസം, എന്നിവരാണ് ബാറ്റിങ്ങ് നിരയിലെ പ്രധാനികള്. എന്നാല് അവസരത്തിനൊത്തുയരാന് പലപ്പോഴും ഇവര്ക്ക് കഴിയുന്നില്ല.
അതാണ് അവരെ ബുദ്ധിമുട്ടിലാക്കുന്നത്. എന്നാല് ബൗളിങ് നിര അതിശക്തമാണ്. മുഹമ്മദ് ആമിറും ജുനൈദ് ഖാനും ഹസന് അലിയും പേസ് ബൗളിങിലെ കരുത്തര്. സ്പിന് നിയന്ത്രിക്കുന്നത് മുഹമ്മദ് ഹഫീസും ഇമദ് വാസിമും. ശ്രീലങ്കക്കെതിരായ അവസാന ഗ്രൂപ്പ് മത്സരത്തില് പരാജയത്തിന്റെ വക്കില് നിന്ന് വിജയത്തിലേക്ക് നടന്നുനീങ്ങിയ പാക് പടയുടെ പോരാട്ടവീര്യം തന്നെയാകും ഇന്നത്തെ പ്രധാന ഘടകവും.
അതേസമയം ഇംഗ്ലണ്ട് തികഞ്ഞ ആത്മവിശ്വാസത്തിലാണ്. ജോ റൂട്ടും, ബെന്സ്റ്റോക്സും മോര്ഗനും ബട്ടലറുമാണ് ബാറ്റിങ്ങിലെ കരുത്തര്. എന്നാല് ഓപ്പണര്മാരായ ജാസണ് റോയ്, ആഡം ഹെയ്ല്സ് എന്നിവര് ഇതുവരെ ഫോമിലേക്കുയര്ന്നിട്ടില്ല. അവരും കൂടി മികച്ച പ്രകടനം നടത്തിയാല് ഇംഗ്ലണ്ട് പ്രതീക്ഷകള്ക്ക് ചിറകുവിരിക്കും. ബൗളിങ്ങ് നിരയും ശക്തമാണ്. പ്ലങ്കറ്റ്, മാര്ക്ക് വുഡ്, ജാക്ക് ബാള്, ആദില് റഷിദ്, മോയിന് അലി എന്നിവര് എതിര് നിരയെ എറിഞ്ഞുവീഴ്ത്താന് കെല്പുള്ളവരാണ്. എന്തായാലും ആവേശകരമായ പോരാട്ടത്തിനായിരിക്കും ഇന്ന് സോഫിയ ഗാര്ഡന്സ് സാക്ഷ്യം വഹിക്കുക.
