മാഡ്രിഡ്: യുവേഫ ചാമ്പ്യന്സ് ലീഗ് ഫുട്ബോളില് ക്വാര്ട്ടര് ഫൈനല് ലക്ഷ്യമിട്ട് അത്ലറ്റികോ മാഡ്രിഡും മാഞ്ചസ്റ്റര് സിറ്റിയും ഇന്ന് വീണ്ടും കളത്തില്. ആദ്യപാദത്തില് എതിരാളികള്ക്കുമേല് മികച്ച വിജയം നേടിയതിന്റെ ആത്മവിശ്വാസത്തിലാണ് ഇരുടീമുകളും.
ആദ്യപാദത്തില് അത്ലറ്റികോ മാഡ്രിഡ് എതിരാളികളുടെ ഗ്രൗണ്ടില് ചെന്ന് 4-2ന് ബയേര് ലെവര്ക്യൂസനെ തോല്പ്പിച്ചു. നാല് എവേ ഗോളിന്റെ ആനുകൂല്യമുള്ളതിനാല് ചെറിയ പരാജയമൊന്നും അത്ലറ്റികോയുടെ ക്വാര്ട്ടര് പ്രവേശനത്തിന് വിലങ്ങുതടിയാകില്ല. മറിച്ച് ലെവര്ക്യൂസിന് ക്വാര്ട്ടറില് കടക്കണമെങ്കില് 3-0ന്റെ വിജയമെങ്കിലും അനിവാര്യം. 2-ന് തോറ്റാലും അത്ലറ്റികോ ക്വാര്ട്ടറിലെത്തും. അന്റോണിയോ ഗ്രിസ്മാനും ഗമെയ്റോയും നിഗ്വസും വെറ്ററന് സ്ട്രൈക്കര് ഫെര്ണാണ്ടോ ടോറസും ഉള്പ്പെടുന്ന അത്ലറ്റികോയ്ക്ക് തന്നെയാണ് ഇന്നത്തെ രണ്ടാം പാദത്തിലും മുന്തൂക്കം.
ആദ്യപാദത്തില് മൊണാക്കോയെ മൂന്നിനെതിരെ അഞ്ച് ഗോളുകള്ക്ക് വിജയിച്ചതിന്റെ ആത്മവിശ്വാസത്തോടെയാണ് മാഞ്ചസ്റ്റര് സിറ്റി എതിരാളികളുടെ തട്ടകത്തില് രണ്ടാം പാദത്തിനിറങ്ങുന്നത്. സ്വന്തം തട്ടകത്തില് മറുപടിയില്ലാത്ത മൂന്ന് ഗോളുകള്ക്കെങ്കിലും വിജയിച്ചാലേ മൊണാക്കോക്ക് ക്വാര്ട്ടറില് കടക്കാനാവൂ. അതേസമയം സിറ്റിക്ക് ഒരു സമനില മതി. ഡേവിഡ് സില്വ, അഗ്യൂറോ, ലിറോയ് സനെ, ഗബ്രിയേല് ജീസസ് തുടങ്ങിയവരുള്പ്പെടുന്ന താരനിരയാണ് സിറ്റിയുടെ കരുത്ത്. ആദ്യപാദത്തില് എതിരാളികളുടെ തട്ടകത്തില് ചെന്ന് മൂന്ന് ഗോള് നേടിയ മൊണാക്കോയും ചില്ലറക്കാരല്ല. സ്വന്തം മൈതാനത്ത് അവര് ഏറെ കരുത്തുകാട്ടുമെന്ന് ഉറപ്പ്. അതുകൊണ്ടുതന്നെ മത്സരം പ്രവചനാതീതമായിരിക്കും.
