പറത്താനം: ഉണങ്ങിയ ചക്കച്ചുള 10 മിനിറ്റ് വെള്ളത്തിലിട്ടാല്‍ പഴയ ചക്കച്ചുളയാകും. രാസവസ്തുക്കളുടെ ചേരുവയില്ലാതെ. ജെക്ക എന്ന പേരില് തയാറാക്കുന്ന ഉണക്കച്ചക്ക കടലുകടക്കാന്‍ ശ്രമിക്കുകയാണ്. പറത്താനം എവര്‍ഗ്രീന്‍ കര്‍ഷക കൂട്ടായ്‌മയാണ് ജെക്കയാക്കി ചക്കയെ മാറ്റിയത്. ചക്ക അരിഞ്ഞ് പുഴുങ്ങിയെടുത്ത് യന്ത്ര സംവിധാനത്തില്‍ ഉണക്കിയെടുത്താണ് ജെക്ക ഉണ്ടാക്കുന്നത്.
പാട്ടത്തിന് സ്ഥലം വാങ്ങി കൃഷിചെയ്തിരുന്ന 16 അംഗ സംഘമാണ് എവര്‍ഗ്രീന്‍. മൂല്യവര്‍ധിത ഉത്പന്നങ്ങള്‍ ഉണ്ടാക്കി വിപണനം ചെയ്യുക എന്ന ആശയമാണ് ചക്കയെ ജെക്കയാക്കിയത്. പിന്നീട് ചക്ക സംസ്‌കരണ യൂണിറ്റിനായി പറത്താനത്ത് ഫാക്ടറിയും സ്ഥാപിച്ചു. ഇടിച്ചക്ക, ചക്കക്കുരു ഉത്പന്നം, ചക്ക പള്‍പ്പ്, ചക്ക അലുവ, കുമ്പളപ്പം എന്നിവയാണ് മറ്റ് പ്രധാന ഉത്പന്നങ്ങള്‍. കേന്ദ്ര കൃഷിവിജ്ഞാനകേന്ദ്രത്തില്‍ നിന്ന് ലഭിച്ച പരിശീലനത്തിന്റെ അടിസ്ഥാനത്തിലാണ് ഫാക്ടറിയുടെ പ്രവര്‍ത്തനം.
നാട്ടുകാരില്‍ നിന്നാണ് ചക്ക വിലയ്‌ക്ക് വാങ്ങുന്നത്. 30 ലക്ഷം രൂപയുടെ യന്ത്രങ്ങളും ചക്ക സംസ്‌കരണത്തിനായി സ്ഥാപിച്ചു. ചക്ക സംസ്‌കരണം 20 കുടുംബശ്രീ പ്രവര്‍ത്തകരുടെ നേതൃത്വത്തിലാണ് നടക്കുന്നത്.
