ലണ്ടന്: മാഞ്ചസ്റ്റര് യുണൈറ്റഡ് മിഡ്ഫീല്ഡര് ബാസ്റ്റിന് ഷ്വയ്ന്സ്റ്റീഗര് അമേരിക്കന് മേജര് സോക്കര് ലീഗിലേക്ക്. മുന് ജര്മ്മന് നായകന് കൂടിയായ ഷ്വയ്ന്സ്റ്റീഗര് ചിക്കാഗോ ഫയറുമായി ഒരുവര്ഷത്തെ കരാര് ഒപ്പിട്ടു.
കഴിഞ്ഞ വര്ഷം തന്നെ ഷിക്കോഗോ ഫയറുമായി ഷ്വെയ്ന്സ്റ്റീഗര് ചര്ച്ച നടത്തിയിരുന്നു. എന്നാല് ജനുവരിയിലെ ട്രാന്സ്ഫര് വിന്ഡോ വരെ കാത്തിരിക്കുകയായിരുന്നു. 2015 ജൂലൈയിലാണ് അദ്ദേഹം യുണൈറ്റഡിനൊപ്പം ചേര്ന്നത്. അന്ന് ലൂയി വാന്ഗാലായിരുന്നു ടീമിന്റെ പരിശീലകന്. എന്നാല് ഈ സീസണില് ഹോസെമൊറീഞ്ഞോ യുണൈറ്റഡിന്റെ പരിശീലകനായി ചുമതലയേറ്റശേഷം ഷ്വയ്ന്സ്റ്റീഗറിന് പലപ്പോഴും ആദ്യ ഇലവനില് സ്ഥാനമുണ്ടായിരുന്നില്ല.
ഈ സീസണില് ഇംഗ്ലീഷ് ലീഗ് കപ്പിലായിരുന്നു അദ്ദേഹത്തിന്റെ ആദ്യ മത്സരം. പിന്നീട് മൂന്ന് മത്സരങ്ങള് മാത്രമാണ് കളിച്ചത്. നേടിയത് ഒരു ഗോളും. യുണൈറ്റഡില് നിന്നും പോകുന്നതില് സങ്കടമുണ്ടെന്നും നിരവധി സുഹൃത്തുക്കള് തനിക്ക് യുണൈറ്റഡിലുണ്ടെന്നും അദ്ദേഹം പറഞ്ഞു.
ബയേണ് മ്യൂണിക്കിനായി 13 സീസണുകളില് കളിച്ച ഈ 32 കാരന് എട്ട് ബുന്ദസ് ലീഗ് കിരീടങ്ങളിലും 7 ജര്മന് കപ്പ് നേട്ടത്തിലും 2013ലെ ചാമ്പ്യന്സ് ലീഗ് കിരീടത്തിലും ടീമിന്റെ ഭാഗമായിരുന്നു. കൂടാതെ 2014-ല് ജര്മനിയെ ലോകകപ്പ് ജേതാക്കളാക്കുന്നതില് നിര്ണായക പങ്കുവഹിച്ചിട്ടുണ്ട്.
