ചെന്നൈ: ആര്കെ നഗറിലെ ബിജെപി സ്ഥാനാര്ഥി ഗംഗൈ അമരന് വിജയാശംസകള് നേര്ന്ന് തമിഴകത്തിന്റെ സൂപ്പര് സ്റ്റാര് രജനികാന്ത്. ഗംഗൈ അമരനെ ഇന്നലെ തന്റെ വീട്ടിലേക്ക് ക്ഷണിച്ച് ചര്ച്ച നടത്തുകയായിരുന്നു രജനി. ജയലളിതയുടെ മരണത്തെത്തുടര്ന്ന് ഉപതെരഞ്ഞെടുപ്പു വേണ്ടി വന്ന ആര്കെ നഗറില് ബിജെപിയുടെ സാധ്യതകള്ക്ക് തിളക്കമേറുന്നതായി ഈ കൂടിക്കാഴ്ചയെ നിരീക്ഷകര് വിലയിരുത്തുന്നു.
ജയലളിതയുടെ മരണത്തെത്തുടര്ന്നുണ്ടായ സംഭവവികാസങ്ങളുടെ പശ്ചാത്തലത്തില് ഈ ഉപതെരഞ്ഞെടുപ്പിന് രാഷ്ട്രീയ പ്രാധാന്യമേറെയാണ്. എഐഎഡിഎംകെയുടെ താത്കാലിക ജനറല് സെക്രട്ടറി ശശികലയുടെ മരുമകന് ദിനകരനാണ് ഇവിടെ പാര്ട്ടി സ്ഥാനാര്ഥി. ദിനകരനെതിരെ മണ്ഡലത്തില് അതൃപ്തി വര്ധിക്കുന്നു എന്നാണ് റിപ്പോര്ട്ട്. ഗാനരചയിതാവ്, സംഗീത സംവിധായകന് എന്നീ നിലകളില് തമിഴ് സാംസ്കാരിക മണ്ഡലത്തില് നിറഞ്ഞുനില്ക്കുന്ന ഗംഗൈ അമരനെ പോരാട്ടത്തിനിറക്കി ബിജെപി എതിരാളികളെ ഞെട്ടിച്ചു.
ഗംഗൈ അമരന്റെ മകനും ചലച്ചിത്ര സംവിധായകനുമായ വെങ്കട് പ്രഭു ഈ കൂടിക്കാഴ്ചയുടെ ചിത്രം ട്വിറ്ററില് പോസ്റ്റ് ചെയ്തു. ”നമ്മുടെ തലൈവര്, സൂപ്പര്സ്റ്റാര് രജനി എന്റെ അച്ഛന്റെ രാഷ്ട്രീയ വിജയത്തിന് ആശംസകള് നേര്ന്നു” എന്നായിരുന്നു അദ്ദേഹത്തിന്റെ പോസ്റ്റ്. പൊയസ് ഗാര്ഡനിലെ രജനിയുടെ വീട്ടില് നടന്ന ഈ കൂടിക്കാഴ്ച്ചയ്ക്ക് വലിയ രാഷ്ട്രീയ പ്രാധാന്യമുണ്ടെന്നാണ് കരുതുന്നത്.
രജനി ഫാന്സ് അസോസിയേഷന് എന്ന വലിയ ആരാധകവൃന്ദമുള്ള രജനി, തന്റെ മനസ് ആര്ക്കൊപ്പമാണെന്ന സന്ദേശമാണ് നല്കിയതെന്നാണ് വിലയിരുത്തല്.
