തൊടുപുഴ: എന്ഡിഎ സര്ക്കാരിന്റെ മൂന്നാം വാര്ഷികാഘോഷങ്ങളുടെ ഭാഗമായി കേന്ദ്ര ഉപരിതല ഗതാഗത വകുപ്പ് സഹ മന്ത്രി പൊന്രാധാകൃഷ്ണന് നാളെ തൊടുപുഴയില് എത്തും.
കേന്ദ്രസര്ക്കാര് നടപ്പിലാക്കിയിട്ടുള്ള ജനോപകരപ്രദമായ പദ്ധതികളക്കുറിച്ചുള്ള വിശദമായ വിവരങ്ങള് ജനങ്ങളില് എത്തിക്കുക എന്ന ലക്ഷ്യത്തോടെ രാജ്യവ്യാപകമായി സംഘടിപ്പിച്ചിട്ടുള്ള പരിപാടികളുടെ ഭാഗമാണ് കേന്ദ്രമന്ത്രി തൊടുപുഴയില് എത്തുന്നത്. പരിപാടിയുടെ ഭാഗമായി രാവിലെ 11.30 ന് കേന്ദ്ര ഉപരിതല ഗതാഗത വകുപ്പ് സഹ മന്ത്രി പൊന് രാധാകൃഷ്ണന് കോലാനി പാറക്കടവ് പട്ടിക ജാതി കോളനി സന്ദര്ശിക്കും. തുടര്ന്ന് 12.30 ന് കുടയത്തൂര് സരസ്വതി വിദ്യാഭവന് സി ബി എസ് സി സ്കൂളില് കെച്ചിന് ഷിപ്പിയാര്ഡിന്റെ സാമ്പത്തിക സഹായം ഉപയോഗിച്ച് ട്രൈബല് പെണ്കുട്ടികള്ക്കായി നിര്മ്മിച്ചിട്ടുള്ള ഹോസ്റ്റലിന്റെ ഉത്ഘാടനം നിര്വ്വഹിക്കും.
വാര്ഷികാഘോഷ പരിപാടികളുടെ ഭാഗമായുള്ള പൊതു പരിപാടി ഉച്ചക്ക് ഒരു മണിക്ക് മേള ചക്രവര്ത്തി പത്മശ്രീ പെരുമനം കുട്ടന്മാരുടെ നേതൃത്വത്തില് നാല്പ്പതോളം കലാകാരന്മാര് അണി നിരക്കുന്ന പാണ്ടിമേളത്തോടെ ആരംഭിക്കും. പൊതു സമ്മേളനം കേന്ദ്രമന്ത്രി ഉദ്ഘാടനം ചെയ്യും. കോലാനിയില് ദീനദയ സേവാ ട്രസ്റ്റിന്റെ കീഴില് പ്രവര്ത്തിക്കുന്ന സുദര്ശനം സ്പെഷ്യല് സ്കൂളിന് കെച്ചിന് ഷിപ്പിയാര്ഡ് നല്കുന്ന സ്കൂള് ബസിന്റെ താക്കോള്ദാനവും യോഗത്തില് കേന്ദ്രമന്ത്രി നിര്വ്വഹിക്കും. കേന്ദ്ര സര്ക്കാരിന്റെ വിവിധ പദ്ധതികളായ പ്രധാനമന്ത്രി ആവാസ് യോജചന, ഉജ്ജ്വല് യോചന, മുദ്രാ ലോണ് തുടങ്ങിയ പദ്ധതികളുടെ ഗുണഭോക്താക്കളുമായി കേന്ദ്ര മന്ത്രി നേരിട്ട് സംവധിക്കുകയും സംശയങ്ങള്ക്ക് മറുപടി നല്കുകയും ചെയ്യും. കൂടാതെ വിവിധ കേന്ദ്ര സര്ക്കാര് പദ്ധതികളില് ഭാഗഭാക്കാന് ആഗ്രഹിക്കുന്നവര്ക്കും അവകള് ലഭിക്കാന് തടസ്സങ്ങള് നേരിട്ടവര്ക്കും മന്ത്രിയോട് നേരിട്ട് പരാതികള് ബോധിപ്പിക്കുവാനും പ്രത്യേകം സൗകര്യങ്ങള് ഒരുക്കിയിട്ടുണ്ട്.
ഇടുക്കി എം.പി. അഡ്വ. ജോയിസ് ജോര്ജ്ജിന്റെ അദ്ധ്യക്ഷതയില് ചേരുന്ന സമ്മേളനത്തില് തൊടുപുഴ എംഎല്എ പി ജെ ജോസഫ്, തൊടുപുഴ നഗരസഭാ അദ്ധ്യക്ഷ സഫിയ ജബ്ബാര്, കൊച്ചിന് ഷിപ്പിയാര്ഡിന്റെ ചെയര്മാനും മാനേജിംഗ് ഡയറക്ടറുമായ മധു എസ് നായര്, ഡയറക്ടര് ബി രാധാകൃഷ്ണ മേനോന് ഇടുക്കി ജില്ലാ കളക്ടര് ജി ആര് ഗോകുല് തുടങ്ങിയവര് പങ്കെടുക്കും.
