പാനൂര്: വേണം ഞങ്ങള്ക്കും ഒരു ബസ് സര്വ്വീസ്. നരിക്കോട്മല പ്രദേശവാസികളായ 120 ഓളം കുടുംബങ്ങള്ക്ക് ഇന്നും ബസ് യാത്ര അന്യമാണ്. റോഡ് നിര്മ്മാണമൊക്കെ പൂര്ത്തിയായി നില്ക്കുന്ന വനവാസികള് ഏറെയുളള ഈ പ്രദേശത്തെ യാത്രാസൗകര്യത്തിന് ഏക ആശ്രയം ജീപ്പും ലോറിയുമാണ്. ഇതുവരെ പൊട്ടിപൊളിഞ്ഞ് കാല്നടയാത്ര പോലും ദുഷ്കരമായിരുന്ന ഇവിടുത്തെ റോഡ് നിര്മ്മാണം പൂര്ത്തിയായിക്കഴിഞ്ഞു. കല്ലുവളപ്പ്-നരിക്കോട് മല റോഡ് നിര്മ്മാണം പൂര്ത്തിയായതോടെ ഇനിയെങ്കിലും ഒരു കെഎസ്ആര്ടിസി ബസ് എങ്കിലും ഇവിടുത്തുകാര് പ്രതീക്ഷിക്കുന്നു. മുമ്പ് പല ഭരണകര്ത്താക്കളും ഇവിടെ സന്ദര്ശിച്ച് സര്ക്കാര് ബസ് തരപ്പെടുത്താമെന്ന് പ്രഖ്യാപിച്ചതല്ലാതെ നടപ്പാക്കിയില്ല. ഇവിടുത്തുകാര് അസുഖം വന്നാല് ചികിത്സ തേടി പാനൂരിലെത്താന് സ്വകാര്യ വാഹനങ്ങള്ക്കു നല്കേണ്ടത് ഭീമമായ തുകയാണ്. കരിങ്കല്ക്വാറികളില് നിന്നും ടണ്കണക്കിന് ഭാരംകയറ്റിപ്പോകുന്ന ലോറികള് കാരണം റോഡ് പൂര്ണ്ണമായും തകരുകയാണ് പതിവ്. ഇതും ഭീഷണിയായി തുടരുന്നു. പാത്തിക്കല് ഭാഗത്ത് വരെ രണ്ടു സ്വകാര്യബസുകള് എത്തുന്നുണ്ട്. ഇത് നരിക്കോട്മലയിലേക്ക് ദീര്ഘിപ്പിച്ചാല് തന്നെ താല്ക്കാലിക പരിഹാരമാവുകയും ചെയ്യും.
സമാനമായ പ്രശ്നം തന്നെയാണ് കിഴക്കന് മേഖലയായ കരിയാരിച്ചാല് വെങ്ങതോടുകാര്ക്കും പറയാനുളളത്. പൊട്ടിപൊളിഞ്ഞ റോഡിലൂടെ കാല്നടയാത്ര പോലും ദുഷ്കരം. കോഴിക്കോട് ജില്ലാ അതിര്ത്തി പങ്കിടുന്ന ഈ പ്രദേശത്ത് ഏകദേശം 200ഓളം കുടുംബങ്ങളുണ്ട്. സ്വകാര്യ വാഹനങ്ങളും ഇരുചക്ര വാഹനവുമാണ് പുറംലോകത്തെത്താന് ആശ്രയം. 17 വര്ഷം മുന്പ് ഒരു സ്വകാര്യബസ് സര്വ്വീസ് നടത്തിയ പ്രദേശം കൂടിയാണിത്. മന്ത്രിയുടെ മണ്ഡലത്തില് ഒരു വിഭാഗം ജനങ്ങള് യാത്രസൗകര്യമില്ലാതെ ബുദ്ധിമുട്ടുന്ന ദയനീയത പറഞ്ഞറിയിക്കാന് പറ്റാത്ത തരത്തിലാണ്. കാര്ഷിക മേഖലയില് ജീവിതം നയിക്കുന്ന ഇവരുടെ മക്കള്ക്കും പഠിക്കണം. പുതിയ അദ്ധ്യയന വര്ഷവും കാലവര്ഷവും പഠിതാക്കളില് ഏറെ ആശങ്ക സൃഷ്ടിക്കുന്നു. തകര്ന്നു കിടക്കുന്ന റോഡിന്റെ നവീകരണം നടത്തി ഇവിടുത്തുകാരുടെ യാത്രാക്ലേശം പരിഹരിക്കുക തന്നെ വേണം. പൊയിലൂരിന്റെ അടുത്ത പ്രദേശമായ ചമതക്കാട് ഭാഗത്തും യാത്രസൗകര്യം വെല്ലുവിളിയുയര്ത്തുന്നതാണ്. ഏറെ പ്രസിദ്ധമായ പൊയിലൂര് മഠപ്പുര ഭാഗത്ത് ബസ് ഓട്ടമില്ല. ചമതക്കാട് പോകുന്ന രണ്ടു സ്വകാര്യ ബസുകള് കേളുമുക്കില് നിറുത്തുകയാണ് പതിവെന്ന് നാട്ടുകാര് പരാതിപ്പെടുന്നു. പെര്മിറ്റ് പാലിക്കാതെ സ്വകാര്യ ബസുകള് തോന്നുംപടി ഓടുന്നതും ജനങ്ങള്ക്ക് ബുദ്ധിമുട്ടുണ്ടാക്കുന്നതാണ്. പാനൂര് മേഖല പൂര്ണ്ണമായും സ്വകാര്യ ബസ് സര്വ്വീസിനെ ആശ്രയിച്ചാണ് നില്ക്കുന്നത്. 79 സ്വകാര്യബസുകള് പാനൂര് ബസ് സ്റ്റാന്റില് എത്തുന്നുണ്ട്. കെഎസ്ആര്ടിസി ബസുകള് പരിമിതമാണ്. മൈസൂര്, കോഴിക്കോട്, കണ്ണൂര് ഭാഗത്തേക്ക് ഓരോ ബസുകള് സര്വ്വീസ് നടത്തുന്നുണ്ട്. ചെറുവാഞ്ചേരി, വളയം, ചെണ്ടയാട് ഭാഗങ്ങളിലേക്ക് കെഎസ്ആര്ടിസി സര്വ്വീസ് നടത്തുന്നുണ്ടെങ്കിലും ട്രിപ്പു മുടക്കവും പതിവാണ്.
