കട്ടപ്പന : ഇടുക്കി ജില്ലയിലെ വനവാസി ജനസമൂഹം താമസിക്കുന്ന പഞ്ചായത്തുകളിലൊന്നില് സ്ഥിതിചെയ്യുന്ന സര്ക്കാര് സ്കൂളാണ് തോപ്രാംകുടി ഗവ.ഹയര് സെക്കണ്ടറി സ്കൂള്. വനവാസികുട്ടികള് ഉള്പ്പെടെ 760 ഓളം കുട്ടികള് ഇവിടെ പഠിക്കുന്നുണ്ട്.
എന്നാല് അസൗകര്യങ്ങളുടെ കൂമ്പാരമാണ് ഇവിടുള്ളത്. പ്രധാന ടൗണായ തോപ്രാംകുടിയില് നിന്നും രണ്ടു കിലോമിറ്ററോളം ഉള്ളിലായാണ് സ്കൂള് സ്ഥിതിചെയ്യുന്നത്. ഈ പ്രദേശത്തേക്ക് വാഹന സൗകര്യം ഇല്ലാത്തതിനാല് ഏറെ ദുരിതത്തിലാണ് വിദ്യാര്ഥികള്. പുഷ്പഗിരി, ഉദയഗിരി, പതിനാറാംകണ്ടം, മുരിക്കാശേരി, വാത്തിക്കുടി തുടങ്ങിയ ഇടങ്ങളില് നിന്ന് റൂട്ട് ബസില് കയറി തോപ്രാംകുടിയിലെത്തുകയും ഇവിടെനിന്നും കിലോമീറ്ററുകള് നടന്നുമാണ് വിദ്യാലയത്തില് എത്തുന്നത്. മേലേചിന്നാര്, മഞ്ഞപ്പാറ, പൊന്നമ്മല, ഈട്ടിത്തോപ്പ് എന്നിവിടങ്ങളില് നിന്നും വരുന്നവരുടെ കാര്യവും വിഭിന്നമല്ല.
സ്കൂളിന് സ്വന്തമായൊരു ബസ് ഇല്ലാത്തതിനാല് ഏറെ ദുരിതത്തിലാണ് വിദ്യാലയം . സ്കൂളിന് ആവശ്യത്തിന് കെട്ടിടങ്ങള് ഇല്ല എന്നതാണ് മറ്റൊരു പ്രശനം. ഹൈസ്കൂള് വിഭാഗത്തില് ബലവത്തായ കെട്ടിടമില്ല. ഓഫീസ് റൂം ഉള്പ്പെടെ എല്ലാം ചോര്ന്നൊലിക്കുന്ന അവസ്ഥയിലാണുള്ളത്. കെട്ടിടങ്ങളുടെ മേല്ക്കുര നിര്മ്മിച്ചിരിക്കുന്ന തടികള് ജീര്ണാവസ്ഥയിലും ചിതലെടുത്ത നിലയിലുമാണ്.
