കണ്ണൂര്‍: എസ്എസ്എല്‍സി ഫലം പുറത്തു വരികയും പ്ലസ്‌വണ്‍ പ്രവേശനത്തിന് ഓണ്‍ലൈന്‍ വഴി അപേക്ഷകള്‍ സ്വീകരിച്ചു തുടങ്ങുകയും ചെയ്തു കഴിഞ്ഞു. എസ്എസ്എല്‍സി പാസായ ജില്ലയിലെ ഒട്ടുമിക്ക വിദ്യാര്‍ത്ഥികള്‍ക്കും ജില്ലയില്‍ നിലവിലുളള സ്‌ക്കൂളുകളിലെ പ്ലസ്ടു സീറ്റുകളിലും വിഎച്ച്‌സി, ഐടിഐ ഉള്‍പ്പെടെയുളള സ്ഥാപനങ്ങളിലും ഉപരി പഠനത്തിന് പ്രവേശനം ലഭിക്കും. എന്നാല്‍ തങ്ങള്‍ ഇഷ്ടപ്പെട്ട ഗ്രൂപ്പുകള്‍ ലഭ്യമാവുക ബുദ്ധിമുട്ടാവും. കാരണം സയന്‍സ്,കൊമേഴ്‌സ് വിഭാഗങ്ങളില്‍ ആവശ്യക്കാരേക്കാളും കുറവു സീറ്റുകള്‍ മാത്രമാണ് ഇപ്പോഴും ജില്ലയില്‍ ഉളളത്. ആയിരത്തോളം സീറ്റുകള്‍ വിവിധ വിഎച്ച്എസ്‌സി സ്‌ക്കൂളുകളിലായി വൊക്കേഷണല്‍ കോഴ്‌സുകള്‍ക്കായി ഉണ്ട്. എസ്എസ്എല്‍സി യോഗ്യതയുളളവര്‍ക്കായി വിവിധ ട്രേഡുകളിലായി ഏതാണ്ട് ആയിരത്തോളം സീറ്റുകള്‍ ജില്ലയിലെ വിവിധ ഐടിഐകളിലുമുണ്ട്.
ഇഷ്ടപ്പെട്ട ഗ്രൂപ്പ് ലഭിക്കാത്തവര്‍ക്ക് ആഗ്രഹിക്കുന്ന ഗ്രൂപ്പ്തന്നെ തിരഞ്ഞെടുക്കണമെന്നുണ്ടെങ്കില്‍ കേരള സ്റ്റേറ്റ് ഓപ്പണ്‍ സ്‌ക്കൂള്‍ വഴി രജിസ്ട്രര്‍ ചെയ്ത് ജില്ലയില സമാന്തര വിദ്യാഭ്യാസ സ്ഥാപനങ്ങളില്‍ ഉയര്‍ന്ന ഫീസ് നല്‍കി ഉപരി പഠനം നടത്തേണ്ടി വരും
34,502 പേര്‍വിദ്യാര്‍ത്ഥികള്‍ ജില്ലയില്‍ ഉപരി പഠനത്തിന് യോഗ്യതനേടിയത്. സയന്‍സ്,കൊമേഴസ്,ഹ്യുമാനിറ്റീസ് വിഷയങ്ങളിലായി 33,018 പ്ലസ്ടുസീറ്റുകളാണ് സര്‍ക്കാര്‍,എയിഡഡ്,അണ്‍ എയിഡഡ് സ്‌ക്കൂളുകളിലായി ജില്ലയില്‍ ഉളളത്. ഇതില്‍ 80 ഗവണ്‍മെന്റ് സ്‌ക്കൂളുകളില്‍ 16872 മെറിറ്റ് സീറ്റുകളും 528 സ്‌പോര്‍ട്‌സ് സീറ്റുകളുമടക്കം 17400 സീറ്റുകളാണ് ഉളളത്. 61 എയിഡഡ് സ്‌ക്കൂളുകളിലായി 8078 മെറിറ്റ് സീറ്റുകളും 298 സ്‌പോര്‍ട്‌സ് റിസര്‍വേഡ് സീറ്റുകളും 3192 മാനേജ്‌മെന്റ് സീറ്റുകളും 1392 കമ്മ്യൂണിറ്റി ക്വാട്ടയില്‍പ്പെട്ട സീറ്റുകളും ഉള്‍പ്പെടെ 12960 സീറ്റുകളാണ് ഉളളത്. 16 അണ്‍ എയിഡഡ് സ്‌ക്കൂളുകളിലായി 2658 സീറ്റുകളാണ് ഉളളത്.
സര്‍ക്കാര്‍ മേഖലയില്‍ 132 സയന്‍സ്,69 ഹ്യൂമാനിറ്റീസ്, 89 കൊമേഴ്‌സ് ബാച്ചുകളും എയിഡഡ് മേഖലയില്‍ 112 സയന്‍സ്,38 ഹ്യൂമാനിറ്റീസ്, 66 കൊമേഴ്‌സ് ബാച്ചുകളും അണ്‍ എയിഡഡ് മേഖലയില്‍ 23 സയന്‍സ്,7 ഹ്യൂമാനിറ്റീസ് ,14 കൊമേഴ്‌സ് ബാച്ചുകളുമാണ് ജില്ലയില്‍ ഉളളത്.
17417 ആണ്‍കുട്ടികളും 17085 പെണ്‍കുട്ടികളുമാണ് ജില്ലയില്‍ ഉപരി പഠനത്തിന് യോഗ്യത നേടിയത്. 1997 പേര്‍ മുഴുവന്‍ വിഷയങ്ങള്‍ക്കും എ പ്ലസ് നേടി. . 62 സ്‌ക്കൂളുകളാണ് ഇത്തവണ ജില്ലയില്‍എസ്എസ്എല്‍സിക്ക് നൂറ് മേനി നേടിയത്.
ഇന്നലെവരെ ഓണ്‍ലൈന്‍ വഴി ജില്ലയിലെ സ്‌ക്കൂളുകളിലേക്ക് 32982 പേര്‍ അപേക്ഷ നല്‍കി. ഇതില്‍ 32580 അപേക്ഷകള്‍ സ്വീകരിച്ചു.
