കണ്ണൂര്: രാമന്തളിയിലെ ആര്എസ്എസ് മണ്ഡല് കാര്യവാഹ് കക്കന്പാറയിലെ സി.ബിജുവിനെ വെട്ടിക്കൊലപ്പെടുത്തിയ സംഭവത്തില് പോലീസിന്റെ ഭാഗത്തുനിന്നും നിഷ്പക്ഷവും കാര്യക്ഷമവുമായ അന്വേഷണം വേണമെന്ന് പീപ്പിള്സ് മൂവ്മെന്റ് ഫോര് പീസ് ഭാരവാഹികള് ആവശ്യപ്പെട്ടു. മരിച്ച ബിജുവിന്റെ വീട് അന്താരാഷ്ട്ര സമാധാന പ്രവര്ത്തകനും പീപ്പിള്സ് മൂവ്മെന്റ് ഫോര് പീസ് സ്ഥാപകനുമായ പി.വി.രാജഗോപാലിന്റെ നേതൃത്വത്തിലുള്ള സംഘം സന്ദര്ശിച്ചു.
ബിജുവിന്റെ പിതാവ് പുരുഷോത്തമനെയും കുടുംബാംഗങ്ങളെയും സംഘം ആശ്വസിപ്പിച്ചു. അക്രമം നടത്തുന്നവര്ക്കെതിരെ മുഖം നോക്കാതെ നടപടിയെടുക്കുമെന്ന് മുഖ്യമന്ത്രി ഉറപ്പ് നല്കിയതായി രാജഗോപാല് അറിയിച്ചു. കൊല്ലപ്പെട്ടവരുടെ കുടുംബാംഗങ്ങള്ക്ക് രാഷ്ട്രീയം നോക്കാതെ സഹായം നല്കുമെന്നും സമാധാനം നിലനിര്ത്താനാവശ്യമായ നടപടികള് സ്വീകരിക്കുമെന്നും പീസ് മൂവ്മെന്റിന്റെ പ്രവര്ത്തനങ്ങള്ക്ക് പിന്തുണ നല്കുമന്നും പി.വി.രാജഗോപാലന്പറഞ്ഞു. പോലീസിന്റെ ഭാഗത്തുനിന്നും ഇതിനായി സഹായങ്ങള് ലഭ്യമാക്കണമെന്നും അദ്ദേഹം ആവശ്യപ്പെട്ടു. പീസ് മൂവ്മെന്റ് ചെയര്മാന് ഫാ.സ്കറിയ കല്ലൂര്, ജനറല് കണ്വീനര് അഡ്വ.ബിനോയ് തോമസ്, കാരയില് സുകുമാരന്, പവിത്രന് തില്ലങ്കേരി, ഹരിദാസ് മംഗലശ്ശേരി, പ്രദീപന് തൈക്കണ്ടി, ഷമീല് ഇഞ്ചിക്കല്, പി.എം.സുരേന്ദ്രനാഥ്, ബെന്നി, അഡ്വ.ടോണി ജോസഫ്, ജിമ്മി, അശ്വിന് മതുക്കോത്ത്, ജോസ് തുടങ്ങിയവരും സംഘത്തിലുണ്ടായിരുന്നു.
