കണ്ണൂര്: കേരളത്തിലെ മുഴുവന് ജലസ്രോതസ്സുകളും തിരിച്ചുപിടിക്കാന് സര്ക്കാര് സമഗ്ര പദ്ധതി തയ്യാറാക്കിവരുന്നതായി ധനകാര്യ മന്ത്രി ഡോ.തോമസ് ഐസക് പറഞ്ഞു. കാനാമ്പുഴ അതിജീവന പരിപാടിയുടെ ഭാഗമായുള്ള ശുചീകരണ പ്രവൃത്തി താഴെ ചൊവ്വയില് ഉദ്ഘാടനം ചെയ്ത് സംസാരിക്കുകയായിരുന്ന തോമസ് ഐസക്ക്. ഇതിനായി വിവിധ മേഖലകളില് സമഗ്ര മാസ്റ്റര് പ്ലാന് തയ്യാറാക്കും. കാനാമ്പുഴയെ തിരിച്ച് പിടിച്ച് വിവിധ പദ്ധതികള് സംഘടിപ്പിക്കാന് മാസ്റ്റര് പ്ലാന് ഉണ്ടാക്കിയാല് എത്ര കോടികളും സര്ക്കാര് നല്കും. നഗരത്തിലെ പ്രധാന മാലിന്യ വാഹിനിയായ പുഴയില് ട്രീറ്റ്മെന്റ് പ്ലാന്റ് സ്ഥാപിക്കണം. വികസനത്തിന് പണം ഒരു തടസ്സമല്ല. എല്ഡിഎഫ് സര്ക്കാരിന്റെ വികസന കാഴ്ചപ്പാട് വ്യത്യസ്തമാണ്. ജനകീയ സഹകരണത്തോടെ പദ്ധതികള് നടപ്പാക്കുക എന്നത് പ്രധാനപ്പെട്ടതാണ്. അതാണ് ഇവിടെ നടപ്പാക്കുന്നത്. പുഴയെ തിരിച്ചു പിടിച്ചാല് കയര് ഭൂവസ്ത്രം വിരിച്ച് ആകര്ഷകമാക്കും. നീര്ത്തടത്തിന്റെ അടിസ്ഥാനത്തിലാണ് മാസ്റ്റര് പ്ലാന് തയ്യാറാക്കേണ്ടതെന്നും ഐസക്ക് പറഞ്ഞു.
നാല് വര്ഷം കൊണ്ട് കേരളത്തിലെ എല്ലാ ജലസ്രോതസ്സുകളും ശുചീകരിക്കുമെന്ന് കാനാമ്പുഴ അതിജീവന പരിപാടി കണ്ടമ്പേത്ത് ഉദ്ഘാടനം ചെയ്ത് സംസാരിക്കവെ ഹരിത കേരള മിഷന് വൈസ് ചെയര്പേഴ്സണ് ഡോ. ടി എന് സീമ പറഞ്ഞു. വൃത്തി, വിളവ്, വെള്ളം ഇതാണ് സര്ക്കാര് ലക്ഷ്യം. ജലമാണ് ജീവന് എന്ന സന്ദേശമുയര്ത്തി പുഴകളെയെല്ലാം പുനരുജ്ജീവിപ്പിക്കണം. പുഴയെ വീണ്ടെടുക്കുന്നതിലൂടെ ഒരു സംസ്കാരത്തെയാണ് വീണ്ടെടുക്കുന്നത്. അശാസ്ത്രീയമായ നിര്മാണ പ്രവര്ത്തനങ്ങളാണ് ജലാശയങ്ങളെ നശിപ്പിക്കുന്നത്. ഇതിനെതിരെ ശക്തമായ ബോധവല്ക്കരണം നടത്തുമെന്നും സീമ പറഞ്ഞു.
വെളിച്ചെണ്ണ നിര്മ്മാണ യൂണിറ്റ്
