കോഴിക്കോട്: അയോദ്ധ്യയില് രാമക്ഷേത്ര നിര്മ്മാണം അനിവാര്യമാണെന്ന് വിശ്വഹിന്ദുപരിഷത്ത് ഇന്റര്നാഷണല് വര്ക്കിംഗ് പ്രസിഡന്റ് അശോക്റാവു ചൗഗുളെ.
രാമക്ഷേത്ര നിര്മ്മാണമെന്നത് യുപിയിലെയോ ഭാരതത്തിലെയോ മാത്രം ഹിന്ദുക്കളുടെ ആവശ്യമല്ല. ലോകത്തിലാകമാനമുള്ള ഹിന്ദുക്കളുടെ പുണ്യഭൂമിയാണ് അയോദ്ധ്യ. അയോദ്ധ്യയിലുണ്ടായിരുന്ന രാമക്ഷേത്രം തകര്ക്കപ്പെട്ടു എന്നത് യാഥാര്ത്ഥ്യമാണ്. അവിടെ നിന്ന് കണ്ടെത്തിയ ക്ഷേത്രാഅവശിഷ്ടങ്ങള് ഇതിന് തെളിവാണ്. അതാര്ക്കും നിഷേധിക്കാനോ തള്ളിക്കളയാനോ ആവില്ല. കേസ് കോടതിയുടെ പരിഗണനയിലാണ്. കോടതി മുന്നോട്ടുവെച്ച സമവായമുള്പ്പെടെയുള്ള കാര്യങ്ങള് പരിഗണിക്കുന്നുണ്ട്. ജന്മഭൂമിക്ക് നല്കിയ അഭിമുഖത്തില് സംസാരിക്കുകയായിരുന്നു അദ്ദേഹം.
ലോകത്തിന്റെ മുഴുവന് മര്യാദാപുരുഷോത്തമനാണ് ശ്രീരാമചന്ദ്രന്. ഭാരതത്തിന്റെ മുക്കിലും മൂലയിലും ശ്രീരാമചന്ദ്രനെ ആരാധിക്കുന്നവരുണ്ട്. എഴുത്തച്ഛന്റെ അദ്ധ്യാത്മരാമായണത്തിലൂടെയാണ് കേരളം ശ്രീരാമനെ കൂടുതല് അറിഞ്ഞത്. തമിഴ്നാട്ടിലെ ക്ഷേത്രങ്ങളില് രാമകഥ ആലേഖനം ചെയ്തിരിക്കുന്നത് കാണാം. ഈ ക്ഷേത്രങ്ങള് നിര്മ്മിച്ചിരിക്കുന്നത് നൂറ്റാണ്ടുകള്ക്ക് മുമ്പാണ്. ഇതെല്ലാം ചില ഉദാഹരണങ്ങള് മാത്രം.
രാമക്ഷേത്രനിര്മ്മാണത്തിന് അയോദ്ധ്യയിലെയോ യുപിയിലെയോ മുസ്ലീംങ്ങള് എതിരല്ല. കമ്മ്യൂണിസ്റ്റുകളും ചില ബുദ്ധിജീവികളുമാണ് എതിര്ത്ത് സംസാരിക്കുന്നത്. ഈ വിഷയത്തില് കൂടുതല് അറിവുള്ളതുകൊണ്ടല്ല അവര് എതിര്ക്കുന്നത്, ചില നിക്ഷിപ്ത താല്പര്യങ്ങളാണ് പിന്നില്.
ഭാരതത്തിലുണ്ടാകുന്ന ചെറിയ സംഭവങ്ങള് പോലും വലിയ വിവാദങ്ങളാക്കി ചിത്രീകരിക്കുന്നത് ഒരു വിഭാഗം ബുദ്ധിജീവികളും ചില മാധ്യമങ്ങളുമാണ്. അവര്ക്ക് ഇതുകൊണ്ട് എന്ത് നേട്ടമാണ് ലഭിക്കുന്നതെന്ന് അറിയില്ല. ജനങ്ങള് തള്ളിക്കളഞ്ഞ കമ്മ്യൂണിസ്റ്റുകാരും ഇവരെ പിന്തുണയ്ക്കുന്നു. ലോകത്താകമാനം കമ്മ്യൂണിസം ഇല്ലാതാകുകയാണ്. ഭാരതത്തിലും സ്ഥിതി മറിച്ചല്ല. ആശയം നഷ്ടപ്പെട്ട കമ്മ്യൂണിസ്റ്റുകാര് ആയുധംകൊണ്ട് ജനങ്ങളെ ഭയപ്പെടുത്തി കൂടെ നിര്ത്താന് ശ്രമിക്കുകയാണ്. കേരളത്തില് സംഘ പ്രവര്ത്തകര്ക്കുനേരെ വ്യാപക അക്രമങ്ങളാണ് നടത്തുന്നത്.
ജനങ്ങള് സത്യം മനസ്സിലാക്കാന് തുടങ്ങിയതോടെ സിപിഎമ്മിന്റെ അടിത്തറ നഷ്ടപ്പെടുന്നുവെന്നതാണ് ഇതിന് കാരണം. വിശ്വഹിന്ദുപരിഷത്തും ബിജെപിയും ഉള്പ്പെടെയുള്ള ദേശീയപ്രസ്ഥാനങ്ങളെക്കുറിച്ച് വ്യാജപ്രചരണം അഴിച്ചുവിട്ട് ജനങ്ങളെ ഭീതിയിലാഴ്ത്തുകയായിരുന്നു കമ്മ്യൂണിസ്റ്റുകള്. എന്നാലിപ്പോള് ജനം സത്യം മനസ്സിലാക്കുന്നു. പ്രധാനമന്ത്രി നരേന്ദ്രമോദിക്ക് ലഭിക്കുന്ന ജനപിന്തുണ അതിന് തെളിവാണ്. യുപിയിലെ മുസ്ലീം ഭൂരിപക്ഷ പ്രദേശങ്ങളില് പോലും മികച്ച വിജയമാണ് ബിജെപിക്ക് നേടാനായത്.
ഹിന്ദുധര്മ്മത്തെക്കുറിച്ച് കൂടുതല് അടുത്തറിയാന് ലോകം മുഴുവന്
കാതോര്ത്തിരിക്കുകയാണിന്ന്. വിശ്വഹിന്ദുപരിഷത്തിന്റെ നേതൃത്വത്തില് ലോകത്തിന്റെ വിവിധ ഭാഗങ്ങളില് നടക്കുന്ന സേവനപ്രവര്ത്തനങ്ങള്ക്ക് ലഭിക്കുന്ന പിന്തുണ ഇതിന് തെളിവാണ്. കേരളത്തില് എല്ലാജില്ലകളിലും അനാഥരായ കുട്ടികളുടെ സംരക്ഷണത്തിനായി കേന്ദ്രങ്ങള് സ്ഥാപിക്കാന് പദ്ധതിയുണ്ട്. നിലവില് ചില ജില്ലകളില് ഇത്തരം ബാല-ബാലികാ സദനങ്ങളുണ്ട്.
