പാലാ: യുഡിഎഫിനെ പുറംകാലുകൊണ്ട് തൊഴിച്ച് ഇടതുമുന്നണിയില് പ്രവേശിക്കാന് ശ്രമിക്കുന്ന കെ.എം മാണിയും ജോസ്.കെ.മാണിയും ജനാധിപത്യ വിശ്വാസികളില് ഞെട്ടലുണ്ടാക്കിയതായി കോണ്ഗ്രസ് ഭാരവാഹികള് പത്രസ്സമ്മേളനത്തില് വ്യക്തമാക്കി. കോണ്ഗ്രസ് സീറ്റായിരുന്ന കോട്ടയം പാര്ലമെന്റില് നിന്നും ജോസ്.കെ. മാണിയെ മത്സരിച്ച് വിജയിപ്പിച്ചത് കോണ്ഗ്രസ് പ്രവര്ത്തകരാണ്.
രണ്ടിലയെന്തെന്നറിയാത്ത വൈക്കം പോലുള്ള സ്ഥലങ്ങളില് കൈപ്പത്തി തന്നെയാണ് രണ്ടിലയെന്ന് വിശ്വസിപ്പിച്ചാണ് വോട്ടു വാങ്ങി വിജയിപ്പിച്ചത്. ഐക്യമുന്നണി സംവിധാനം കൊണ്ട് പാലായില് കോണ്ഗ്രസ്സിന് നഷ്ടമേ ഉണ്ടായിട്ടുള്ളുവെന്ന് നേതാക്കള് പറഞ്ഞു.
യുഡിഎഫിലെ നേതാക്കള് പാലായില് ഏതെങ്കിലും പരിപാടിയില് പങ്കെടുക്കണമെങ്കില് പിതാവിന്റെയും പുത്രന്റെയും അനുവാദം വേണ്ട അവസ്ഥയായിരുന്നു. ഇടതു മുന്നണിക്ക് മുന്നില് ചെന്ന് നാണം കെട്ടിട്ടുള്ള മാണിയെ കേസുകളില് നിന്ന് മാര്ക്സിസ്റ്റ് ഈശ്വരന്മാര് രക്ഷിക്കട്ടെ, ഇവരുടെ രാഷ്ട്രീയ കപടനാടകം കേരളത്തിലെ എല്ലാ രാഷ്ട്രീയ പാര്ട്ടികളുടെയും മുന്നിലുണ്ടെന്നും പത്രസമ്മേളനത്തില് പങ്കെടുത്ത് ഡിസിസി വൈസ് പ്രസിഡന്റ് എ.കെ ചന്ദ്രമോഹനന്, പ്രൊഫ. സതീഷ് ചൊള്ളാനി, ജോഷി .കെ.ആന്റണി, ബിജു കുന്നുംപുറം, ബിജോയ് ഇടേട്ട് എന്നിവര് പറഞ്ഞു.
