കൊച്ചി: മുഖ്യമന്ത്രി വിഡി സതീശന്റെ പേര് പറഞ്ഞപ്പോള് ബഹുമാനം കാട്ടിയില്ലെന്ന് ആരോപിച്ച് മിമിക്രി കലാകാരന് മഹേഷ് കുഞ്ഞുമോനെതിരെ സൈബറാക്രമണം.അയര്ലണ്ടില് നടന്ന സ്റ്റേജ് പരിപാടിക്കിടെ വി.ഡി. സതീശന്റെ ശബ്ദം അനുകരിച്ചപ്പോള് മുഖ്യമന്ത്രി വിഡി സതീശന് എന്ന് പറയാതെ വിഡി സതീശന് എന്ന് മാത്രം പറഞ്ഞതാണ് സൈബറാക്രമണത്തിന് കാരണം.
എന്നാല് ബഹുമാനക്കുറവ് കൊണ്ടോ അദ്ദേഹത്തെ അപമാനിക്കാനോ വേണ്ടിയല്ല, സാങ്കേതിക ആവശ്യത്തിനായി ഫയലിന്റെ പേര് മാത്രം പറഞ്ഞതാണെന്ന് മഹേഷ് കുഞ്ഞുമോന് വ്യക്തമാക്കി.തന്നെ അധിക്ഷേപിക്കുന്നവര് അഭിപ്രായവ്യത്യാസങ്ങള് മാന്യതയോടെ പ്രകടിപ്പിക്കണമെന്ന് വിനയപൂര്വ്വം അഭ്യര്ത്ഥിക്കുന്നുവെന്നും മഹേഷ് ഫേസ്ബുക്കില് കുറിച്ചു.
‘അയര്ലണ്ടില് നടന്ന ഒരു സ്റ്റേജ് പരിപാടിക്കിടെ താന് വി.ഡി. സതീശന് സാറിന്റെ ശബ്ദം അനുകരിച്ചിരുന്നു.എല്.ഇ.ഡി വാള് പിക്ചര് വരാതെ അല്പം സമയം എടുത്തപ്പോ എല്.ഇ.ഡി. വാള് ഓപ്പറേറ്റ് ചെയ്തിരുന്ന വ്യക്തിയോട്, സ്ക്രീനില് കാണിക്കേണ്ട ചിത്രത്തിന്റെ ഫയലിന്റെ പേര് അറിയിക്കുന്നതിനായാണ് മൈക്കിലൂടെ ‘വിഡി സതീശന് എന്ന് പറഞ്ഞത്. അപ്പോള് ‘സാര്’ എന്നോ ‘മുഖ്യമന്ത്രി’ എന്നോ ചേര്ത്ത് പറയാത്തത് ബഹുമാനക്കുറവ് കൊണ്ടോ അദ്ദേഹത്തെ അപമാനിക്കാനോ വേണ്ടിയല്ല. സാങ്കേതിക ആവശ്യത്തിനായി ഫയലിന്റെ പേര് മാത്രം പറഞ്ഞതാണ്. ആ വീഡിയോയുടെ ഒരു ഭാഗം മാത്രം സാമൂഹ്യമാധ്യമത്തിലൂടെ പ്രചരിച്ചതോടെ, താന് അദ്ദേഹത്തെ ബഹുമാനമില്ലാതെ അഭിസംബോധന ചെയ്തുവെന്ന രീതിയില് ചിലര്ക്കിടയില് തെറ്റിദ്ധാരണ ഉണ്ടായി- മഹേഷ് പറയുന്നു.
തന്റെ ഭാഗത്തുനിന്ന് ഉണ്ടായ ഈ സാഹചര്യം കാരണം ആര്ക്കെങ്കിലും വിഷമമോ വേദനയോ തോന്നിയിട്ടുണ്ടെങ്കില്, അതില് ഹൃദയപൂര്വം ക്ഷമ ചോദിക്കുന്നു. ആരെയും വേദനിപ്പിക്കുകയോ അപമാനിക്കുകയോ ചെയ്യുക എന്നത് ഉദ്ദേശ്യമല്ല. എല്ലാവരെയും ഒരുപോലെ ബഹുമാനിക്കുന്ന ആളാണ് താന്. അതോടൊപ്പം, അഭിപ്രായവ്യത്യാസങ്ങള് മാന്യതയോടെ പ്രകടിപ്പിക്കണമെന്ന് വിനയപൂര്വം അഭ്യര്ത്ഥിക്കുന്നു. വ്യക്തിപരമായി അസഭ്യം പറയുകയും അധിക്ഷേപിക്കുകയും ചെയ്യുന്ന സന്ദേശങ്ങള് മാനസികമായി ഏറെ വേദനിപ്പിക്കും.പരസ്പര ബഹുമാനവും മനുഷ്യസ്നേഹവും കാത്തുസൂക്ഷിക്കാന് എല്ലാവരും ശ്രമിക്കുമെന്ന് പ്രതീക്ഷിക്കുന്നു. തന്നെ സ്നേഹിക്കുകയും പിന്തുണയ്ക്കുകയും ചെയ്യുന്ന എല്ലാവര്ക്കും ഹൃദയം നിറഞ്ഞ നന്ദി- മഹേഷ് കുഞ്ഞുമോന് ഫേസ്ബുക്കില് കുറിച്ചു.
