കാസര്കോട്: ഗുഡ്മോണിങ് കാസര്കോട് സംഘടിപ്പിക്കുന്ന കാസര്കോട് മാരത്തണ് നാളെ നടക്കുമെന്ന് ഭാരവാഹികള് വാര്ത്താ സമ്മേളനത്തില് അറിയിച്ചു. താളിപ്പടുപ്പ് മൈതാനം മുതല് കാസര്കോട് മുനിസിപ്പല് സ്റ്റേഡിയം വരെയാണ് മാരത്തണ്. ആരോഗ്യവും സൗഹൃദവും എന്ന സന്ദേശവുമായാണ് മാരത്തണ് സംഘടിപ്പിക്കുന്നത്. വിവിധ ജില്ലകളില് നിന്നുള്ള അത്ലറ്റുകള് പങ്കെടുക്കും.
പുരുഷ, വനിത വിഭാഗത്തിലാണ് മത്സരം. ഒന്ന്, രണ്ട്, മൂന്ന് സ്ഥാനത്തെത്തുന്നവര്ക്ക് 10,000, 5000, 3000 രൂപയും ട്രോഫിയും സര്ട്ടിഫിക്കറ്റും മെഡലും നല്കും. കാസര്കോട് ജില്ലയില് നിന്നുള്ള ആദ്യ മൂന്ന് സ്ഥാനക്കാര്ക്കും 45 വയസിന് മുകളിലുള്ളവര്ക്കും പ്രത്യേക സമ്മാനം നല്കും. പങ്കെടുക്കുന്ന എല്ലാവര്ക്കും മെഡലും ജേഴ്സിയും നല്കും. പങ്കെടുക്കുന്നവര് നാളെ രാവിലെ അഞ്ചിന് താളിപ്പടുപ്പ് മൈതാനിയിലെത്തി രജിസ്റ്റര് ചെയ്യണം. 6.30ന് രജിസ്ട്രേഷന് നിര്ത്തും. രജിസ്ട്രേഷന് ഫീസില്ല. ഏഴ് മണിക്ക് മാരത്തണ് ആരംഭിക്കും. ജില്ലാ കലക്ടര് കെ.ജീവന്ബാബു, ജില്ലാ പോലീസ് മേധാവി കെ.ജി.സൈമണ് എന്നിവര് ചേര്ന്ന് ഫഌഗ് ഓഫ് ചെയ്യും.
മുനിസിപ്പല് സ്റ്റേഡിയത്തില് രാവിലെ 8.30ന് നടക്കുന്ന സമാപനം മന്ത്രി ഇ.ചന്ദ്രശേഖരന് ഉദ്ഘാടനം ചെയ്യും. ഇന്ത്യന് വ്യോമസേന ഫുട്ബോള് ടീം അംഗമായിരുന്ന, 1965, 1971 ഇന്ത്യാ പാക്ക് യുദ്ധത്തില് പങ്കെടുത്ത അല്ത്താഫ് ഹുസൈന്, അന്തര്ദേശീയ കാര് റാലി ചാമ്പ്യന് മൂസഷെരീഫ്, കേരള രഞ്ജി ക്രിക്കറ്റ് ടീം അംഗം മുഹമ്മദ് അസറുദ്ദീന്, ബുള്ളറ്റില് 15 ദിവസം കൊണ്ട് 2300 കിലോമീറ്റര് ഹിമാലയന് ഒഡീസി യാത്ര നടത്തിയ ആദ്യത്തെ കേരള വനിത പി.എന്.സൗമ്യ, മലേഷ്യയില് നടന്ന ത്രോബോള് ഏഷ്യന് ചാമ്പ്യന്ഷിപ്പില് ഇന്ത്യന് ജൂനിയര് ടീം അംഗമായ എം.യഷ്മിത എന്നിവരെ ആദരിക്കും.
ഫോണ്: 9446673961, 9446981133. വാര്ത്താസമ്മേളനത്തില് സംഘാടക സമിതി ചെയര്മാന് ഹാരിസ് ചൂരി, കണ്വീനര് ബാലന് ചെന്നിക്കര, ട്രഷറര് എ.വി.പവിത്രന് മാസ്റ്റര്, മുഹമ്മദ് ഹാഷിം, ഫസല് റഹ്മാന്, റയീസ് എന്നിവര് പങ്കെടുത്തു.
