പൊന്കുന്നം: റേഷന് കടയുടമകള് കാര്ഡ് ഉടമകളെ കബളിപ്പിക്കുന്നെന്ന പരാതി ഒഴിവാക്കാന് തയ്യാറാക്കിയ സര്ക്കാര് പദ്ധതി ജില്ലയില് നടപ്പിലായില്ല. വാഹനവാടകയെ ചൊല്ലിയുള്ള തര്ക്കമാണ് പദ്ധതി ആരംഭിക്കാത്തിന് കാരണം. മെയ് ഒന്നിന് പദ്ധതി ആരംഭിക്കുമെന്നായിരുന്നു പ്രഖ്യാപനം. റേഷന് സാധനങ്ങള് സര്ക്കാരിന്റെ സ്വന്തം കേന്ദ്രങ്ങളില് സംഭരിച്ച് റേഷന് കടകളില് നേരിട്ടെത്തിച്ച് വിതരണം ചെയ്യുന്നതാണ് പദ്ധതി.
മൊത്ത വിതരണക്കാരും റേഷന്കടയുടമകളും സാധനങ്ങള് മറിച്ച് വില്ക്കുന്നുവെന്ന പരാതിയെത്തുടര്ന്നാണ് സര്ക്കാര് ഈ പദ്ധതി നടപ്പിലാക്കാന് തീരുമാനിച്ചത്. കാഞ്ഞിരപ്പള്ളി താലൂക്കില് നിലവിലുള്ള 138 റേഷന് കടകള്ക്കായി നാല് മൊത്തവിതരണ കേന്ദ്രങ്ങളാണ് ഉള്ളത്. ഇവയെ ഒഴിവാക്കി പൊന്കുന്നത്തുള്ള സംസ്ഥാന വേര്ഹൗസിംഗ് കോര്പ്പറേഷന്റെ ഗോഡൗണിലാണ് റേഷന് സാധനങ്ങള് സംഭരിച്ചിട്ടുള്ളത്. വാഹനവാടകയുടെ തര്ക്കത്തില് വിതരണം നീളുന്നതിനാല് ഈ ഗോഡൗണില് സാധനങ്ങള് കെട്ടിക്കിടക്കുകയാണ്. കാര്ഡ് ഉടമകള് വിരലടയാളം പതിച്ച് സാധനങ്ങള് കൈപ്പറ്റുന്നതാണ് പുതിയ രീതി. മൊത്തവിതരണക്കാരെ ഒഴിവാക്കിയതില് പ്രതിഷേധിച്ച് സംസ്ഥാനമെമ്പാടും റേഷന് കടകള് അടച്ച് ഉടമകള് സമരം നടത്തിയിരുന്നു. റേഷന് കാര്ഡുടമകള്ക്ക് പുതിയ കാര്ഡ് നല്കാന് ഇതുവരെ കഴിഞ്ഞിട്ടില്ല.
