തലയോലപ്പറമ്പ്: ഉദയനാപുരം പഞ്ചായത്തില് കുടിവെള്ള ക്ഷാമം രൂക്ഷമാകുമ്പോള് ഭൂഗര്ഭജലം ഊറ്റിയെടുക്കാന് ലക്ഷ്യമിട്ട് ജലസംഭരണ പ്ലാന്റ് നിര്മ്മാണം തകൃതി. പഞ്ചായത്തിലെ 11-ാം വാര്ഡിലാണ് കരമണല് ഖനനത്തിനെടുത്ത നൂറ് അടിയിലേറെ താഴ്ചയുള്ള കുഴികളുടെ വശങ്ങള് കരിങ്കല്കൊണ്ട് കെട്ടിയെടുത്ത് ജലസംഭരണ കേന്ദ്രങ്ങള് തുടങ്ങാന് സ്വകാര്യവ്യക്തി നിര്മ്മാണം നടത്തുന്നത്. ദിവസേന 50 ഓളം തൊഴിലാളികളാണ് ഇവിടെ നിര്മ്മാണ ജോലികളില് ഏര്പ്പെട്ടിരിക്കുന്നത്. നൂറ് അടിയോളം താഴ്ചയുള്ള കുഴികളുടെ ആഴം വീണ്ടും മോട്ടറുകള് ഉപയോഗിച്ച് കൂട്ടിയാണ് ഭൂഗര്ഭജലം ശേഖരിക്കാനുള്ള ജോലികള് പുരോഗമിക്കുന്നത്.
പഞ്ചായത്തില് ഭൂരിഭാഗം സ്ഥലങ്ങളിലും വര്ദ്ധിച്ചതോതിലുള്ള ചരല്മണല് ശേഖരമുള്ളതുകൊണ്ട് നല്ല ശുദ്ധജല സാധ്യത ലക്ഷ്യമിട്ടാണ് കരമണല് ലോബികള് പുതിയ വിപണതന്ത്രവുമായി താവളമുറപ്പിച്ചിരിക്കുന്നത്. പ്രധാന റോഡുകളില് നിന്നും അകന്നുള്ള ഇവിടുത്തെ നിര്മ്മാണ പ്രവര്ത്തനങ്ങള് പുറംലോകം അറിഞ്ഞിട്ടില്ല. പാരിസ്ഥിതിക സന്തുലിതാവസ്ഥയ്ക്ക് വന് ഭീഷണി സൃഷ്ടിക്കുമെന്ന മുന്നറിയിപ്പുകള് പൂര്ണ്ണമായും അവഗണിച്ചാണ് കരമണല് ലോബികളുടെ പുതിയ നീക്കം.
ഉദയനാപുരം പഞ്ചായത്തില് മാത്രം കരമണല് ഖനനം മൂലം നൂറ് അടിയോളം താഴ്ചയുള്ള 300ഓളം കുഴികളുണ്ട്. പ്രദേശത്തെ കിണറുകളെക്കാള് ആഴം കരമണല് ഖനനം നടത്തിയ മിക്ക കുഴികള്ക്കുമുണ്ട്. ഇതുകാരണം പഞ്ചായത്തില് ഏതാണ്ട് ഭൂരിപക്ഷം കിണറുകളും വറ്റിവരണ്ടു. ഉറവയായി കിണറുകളില് എത്തിച്ചേരേണ്ട വെള്ളം മുഴുവന് കരമണല് ലോബികള് കുഴികളുടെ ആഴം വര്ദ്ധിച്ചിപ്പിച്ച് ഊറ്റിയെടുക്കുകയാണെന്ന് ജനങ്ങള് പരാതിപ്പെടുന്നു.
2012 ല് ഉദയനാപുരം പഞ്ചായത്തില് കരമണല് ഖനനം നടത്തുന്നതിന് ജിയോളജി വകുപ്പ് നിരോധനം ഏര്പ്പെടുത്തിയിരുന്നു. കരമണല് ഖനനത്തിന് ശേഷം രൂപപ്പെടുന്ന കുഴികള് പൂര്വ്വ സ്ഥിതിയിലാക്കണമെന്ന വ്യവസ്ഥ അഞ്ചുവര്ഷങ്ങള് പിന്നിടുമ്പോഴും മിക്കവരും പാലിച്ചിട്ടില്ല. കരമണല് ഖനനം നടത്തിയ ഭൂമികള് ബിനാമി പേരുകളിലേക്ക് ആധാരം നടത്തി ഈ നിയമത്തിന്റെ പരിധിയില് നിന്നും കരമണല് ലോബികള് രക്ഷപ്പെടുകയാണ് ചെയ്തിട്ടുള്ളത്. മഴക്കാലങ്ങളില് വെള്ളം നിറഞ്ഞ കുഴികളില് വീണ് നിരവധി അപകട മരണങ്ങള് വെള്ളൂര് അടക്കമുള്ള പഞ്ചായത്തുകളിലുണ്ടായിട്ടുണ്ട്. 1967ലെയും 2015ലെയും കേരള മൈന് മിനറല് കണ്സ്ട്രക്ഷന് ചട്ടങ്ങള് പ്രകാരം ജലസ്രോതസുകളില് നിന്നും കരമണല് ഖനനം ചെയ്യുന്ന സ്ഥലവുമായി 50 മീറ്റര് ദൂരപരിധി വേണമെന്ന നിബന്ധനകളും ഇവിടെ പാലിച്ചിട്ടില്ല. ഈ നിയമങ്ങളെല്ലാം ഉദ്യോഗസ്ഥ രാഷ്ട്രീയ ലോബികളെ വിലയ്ക്കെടുക്ക് കരമണല് ലോബി സ്വന്തം ഇഷ്ടപ്രകാരം ചെയ്യുകയായിരുന്നു.
അതേസമയം, പഞ്ചായത്തില് രൂക്ഷമാകുന്ന കുടിവെള്ള ക്ഷാമത്തിന് പരിഹാരം കാണാന് കരമണല് ഖനനം നടത്തിയ എല്ലാ കുഴികളും മൂടണമെന്ന് നാട്ടുകാര് ആവശ്യപ്പെടുന്നു. കരമണല് ഖനനം നടത്തിയ കുഴികള് പൂര്വ്വസ്ഥിതിയിലാക്കണമെന്ന് ആവശ്യപ്പെട്ട് ജില്ലാ കളക്ടര്, ആര്ഡിഒ, തഹസില്ദാര് എന്നിവര്ക്ക് നാട്ടുകാരുടെ നേതൃത്വത്തില് നിരവധി പരാതികള് നല്കിയെങ്കിലും യാതൊരു നടപടികളും ഇനിയുമുണ്ടായിട്ടില്ല. ഈ ആവശ്യം ഉന്നയിച്ച് പ്രക്ഷോഭ പരിപാടികള് സംഘടിപ്പി ക്കാനുള്ള തയ്യാറെടുപ്പിലാണ് പ്രദേശവാസികള്.
