പീരുമേട്: ബ്രിട്ടീഷുകാരുടെ കാലത്ത് നിര്മ്മിച്ച തേയില ഫാക്ടറിയാണ് ഇന്നലെ അഗ്നി വിഴുങ്ങിയത്. 1923ലാണ് തേയില ഫാക്ടറി പീരുമേട് ഏലപ്പാറ ഹെലുബറിയയില് നിര്മ്മിക്കുന്നത്. പൂര്ണ്ണമായും തടിയിലായിരുന്നു നിര്മ്മാണം. പ്രധാന കെട്ടിടം നാല് നിലയും വശങ്ങളിലേയ്ക്ക് ഒരു നിലവീതം ചാര്ത്തി എടുത്തുമായിരുന്നു കെട്ടിടം നിര്മ്മിച്ചിരുന്നത്. ഇരുമ്പ് ഗ്ലാഡര് ഉപയോഗിച്ച് തറനിര്മ്മിച്ച് അതിന് മുകളില് തടി വിരിച്ചാണ് ഓരോ നിലയും നിര്മ്മിച്ചിരുന്നത്. ഇതാണ് കത്തിനശിച്ചത്.
ഇന്നലെ രാവിലെ 8.30 ഓടെ പ്രധാന കെട്ടിടത്തിന് രണ്ടാംനിലയ്ക്ക് മുകളിലുള്ള ബോയിലറിന് മുകളിലാണ് തീ ആദ്യം കാണുന്നത്. പെട്ടന്ന് തന്നെ തീ ആളിപ്പടരുകയായിരുന്നു എന്നാണ് ജീവനക്കാര് പറയുന്നത്. തേയില വറക്കുന്നതിനിടെ ഉണ്ടായ പൊടിയിലേയ്ക്ക് കൂടി തീ പടര്ന്നതോടെ വന് തീപ്പിടിത്തമാകുകയായിരുന്നു. ഫയര്ഫോഴ്സിനെ വിവരമറിയിക്കാന് കാലതാമസം ഉണ്ടായതും തീ കെട്ടിടത്തില് മൊത്തം പടരാന് കാരണമായി.
9.35 ഓടെയാണ് ആദ്യ ഫയര്ഫോഴ്സ് സംഘം സ്ഥലത്തെത്തുന്നത്. ഇതേ സമയം കെട്ടിടം മുഴുവന് തീ പടര്ന്നിരുന്നു. രണ്ട് വര്ഷത്തോളമായി അടഞ്ഞ് കിടന്നിരുന്ന ഫാക്ടറി നാല് ദിവസം മുമ്പാണ് പ്രവര്ത്തനം ആരംഭിച്ചത്. ഇതേ സമയം വേണ്ട അറ്റകുറ്റ പണികള് നടത്തുകയോ വേണ്ട സുരക്ഷാ മുന്കരുതല് എടുക്കുകയോ ചെയ്തിരുന്നില്ലെന്നാണ് ജീവനക്കാര് തന്നെ പറയുന്നത്. 1044 ഏക്കര് വിസ്തൃതിയുള്ള എസ്റ്റേറ്റിന്റെ അരയേക്കറോളം വരുന്ന ഭൂമിയിലാണ് തേയില ഫാക്ടറി സ്ഥിതി ചെയ്യുന്നത്. തീപ്പിടിത്തത്തില് സംസ്കരിച്ച് സൂക്ഷിച്ചിരുന്ന തേയില അടക്കം കത്തിപ്പോയിട്ടുണ്ട്. സമീപത്തായി സൂക്ഷിച്ചിരുന്ന മോട്ടോറും ജനറേറ്ററും ഫയര്ഫോഴ്സിന്റെ ഇടപെടല് മൂലം തീ പിടിക്കാതെ സംരക്ഷിക്കാന് സാധിച്ചു.
തീ പിടിച്ചതോടെ മേഖലയിലാകെ കടുത്ത ചൂട് അനുഭവപ്പെട്ടതും രക്ഷാ പ്രവര്ത്തനത്തിന് തടസ്സമായി. സമീപത്തെ ലയങ്ങളിലടക്കം താമസിക്കുന്നവരെ രക്ഷാപ്രവര്ത്തനത്തിന്റെ ഭാഗ
മായി മാറ്റിയിരുന്നു. അതേസമയം തീപ്പിടിത്തതില് ദുരൂഹത ഉള്ളതായി നാട്ടുകാര് ആരോപിക്കുന്നു. മേഖലയില് നാളിതുവരെ ഇത്തരത്തില് നിരവധി ഫാക്ടറികള് കത്തിപ്പോയതായും ഇതിനെതിരെ പരാതികള്പോലും നല്കിയിട്ടില്ലെന്നും നാട്ടുകാര് ആരോപിക്കുന്നു. വണ്ടിപ്പെരിയാറിലെ 3 ഫാക്ടറികള് അടുത്തകാലത്ത് കത്തി നശിച്ചിട്ടുണ്ടെന്ന് നാട്ടുകാര് ചൂണ്ടിക്കാണിക്കുന്നു.
