കാലടി: കാലടി ശങ്കരാചാര്യ സംസ്കൃത സര്വ്വകലാശാലയില് ശങ്കരജയന്തി ആഘോഷങ്ങള് 29, 30 തീയതികളില് നടക്കുമെന്നു വൈസ് ചാന്സിലര് ഡോ. എം.സി. ദിലീപ്കുമാര്, കാലടി ഗ്രാമപഞ്ചായത്ത് പ്രസിഡന്റ് അഡ്വ. കെ. തുളസി ടീച്ചര് എന്നിവര് പത്രസമ്മേളനത്തില് അറിയിച്ചു. സര്വ്വകലാശാലയും കാലടി ഗ്രാമപഞ്ചായത്തും സംയുക്തമായാണ് ആഘോഷം സംഘടിപ്പിക്കുന്നത്.
ശ്രീശങ്കര വാര്ഷിക പ്രഭാഷണം, പണ്ഡിത സമാദരണം, സംഗീതക്കച്ചേരി, എന്ഡോവ്മെന്റ് അവാര്ഡുകളുടെ വിതരണം, ശങ്കരാമൃതം സിഡി പ്രകാശനം, നൃത്ത നാടക അവതരണങ്ങള് തുടങ്ങിയവ നടക്കും. സര്വകലാശാലയുടെ തിരുവനന്തപുരം, തുറവൂര്, ഏറ്റുമാനൂര്, പാലക്കാട്, കാഞ്ഞങ്ങാട് എന്നീ കേന്ദ്രങ്ങളിലും ആഘോഷങ്ങളുണ്ടാകും.
29ന് ഉച്ചയ്ക്ക് 2 മണിക്ക് കാമ്പസില് നടക്കുന്ന നിയമസഭാ സ്പീക്കര് പി. ശ്രീരാമകൃഷ്ണന് ഉദ്ഘാടനം ചെയ്യും. അങ്കമാലി എംഎല്എ റോജി എം. ജോണ് അധ്യക്ഷനാകും. രാജീവ് ശിവശങ്കര്, പ്രൊഫ. കാഞ്ചന നടരാജന്, ഡോ. സുവര്ണ്ണ നാലപ്പാട്ട് എന്നിവരെ ആദരിക്കും. എന്ഡോവ്മെന്റ് അവാര്ഡുകളുടെ വിതരണം പിവിസി: ഡോ. ധര്മ്മരാജ് അടാട്ട് നിര്വ്വഹിക്കും.
30ന് രാവിലെ 10 മുതല് ഉച്ചയ്ക്ക് ഒരു മണി വരെ ശ്രീ ശങ്കര വാര്ഷിക പ്രഭാഷണം. വിസി: ഡോ. എം.സി. ദിലീപ്കുമാര് അധ്യക്ഷനാകും. ദല്ഹി യൂണിവേഴ്സിറ്റി ഫിലോസഫി വിഭാഗം സീനിയര് പ്രൊഫ. കാഞ്ചന നടരാജന് ശ്രീ ശങ്കര വാര്ഷിക പ്രഭാഷണം നിര്വ്വഹിക്കും.
പത്രസമ്മേളനത്തില് ഡോ. ധര്മ്മരാജ് അടാട്ട്, ഡോ. ടി. മിനി, ഡോ. ടി. പി. രവീന്ദ്രന്, ഡോ. ബി. ചന്ദ്രിക, പ്രൊഫ എം. മണിമോഹനന്, ഡോ. കെ. യമുന, ഡോ. എം. വി. നടേശന് എന്നിവര് പങ്കെടുത്തു.
സസ്പെന്ഷന് പിന്വലിക്കണമെന്ന് ഐഎംഎ
കൊച്ചി: എറണാകുളം സര്ക്കാര് മെഡിക്കല് കോളേജില് അടിസ്ഥാന സൗകര്യങ്ങളുടെ അപര്യാപ്തമൂലം മെഡിക്കല് വിദ്യാര്ത്ഥിനി മരിക്കാനിടയായ സംഭവത്തില് ഡോ. ജില്സ് ജോര്ജിന്റെ സപ്പെന്ഷന് പിന്വലിക്കണമെന്ന് ഐഎംഎ ആവശ്യപ്പെട്ടു.
മെഡിക്കല് കോളേജിന്റെ ബാലാരിഷ്ടതകള് പരിഹരിക്കുകയാണ് വേണ്ടതെന്ന് ഐഎംഎ അഭിപ്രായപ്പെട്ടു.
