കോട്ടയം: മൂന്നു ദശാബ്ദങ്ങളായി കേരളത്തിലെ ശാസ്ത്രീയ കലകളുടെ ദൃശ്യങ്ങള് ആവിഷ്ക്കരിച്ച പ്രശസ്ത ഫോട്ടോഗ്രാഫര് രാധാകൃഷ്ണവാര്യരെ ശ്രീശങ്കര കഥകളി അരങ്ങിന്റെ ആഭിമുഖ്യത്തില് മെയ് 1ന് ആദരിക്കുന്നു. തൃക്കൈക്കാട്ട് സ്വാമിയാര്മഠം ഹാളില് നടക്കുന്ന പരിപാടിയില് രാവിലെ 9.30 കേളി, 10ന് മഠാധിപതി വാസുദേവ ബ്രഹ്മാനന്ദതീര്ത്ഥ സ്വാമിയാര് ഭദ്രദീപം തെളിയിക്കും. തുടര്ന്ന് കഥകളി ചൊല്ലിയാട്ടം- കഥ ഉത്തരാസ്വയംവരം.
11.30ന് സമാദരണസഭയില് പത്മശ്രീ കലാമണ്ഡലം ഗോപി രാധാകൃഷ്ണ വാര്യരെ ആദരിക്കും. ചന്ദ്രിക, ഡോ. വി.എന്. രാജശേഖരന്പിള്ള, മാത്തൂര് ഗോവിന്ദന്കുട്ടി, കെസി. നാരായണന്, പ്രൊഫ. മേരിമാത്യു, ഡോ. എന്. ശ്രീകുമാര്, ഡോ. പി.വി. വിശ്വനാഥന് നമ്പൂതിരി, സി.പി. മധുസൂദനന്, സജനീവ് ഇത്തിത്താനം തുടങ്ങിയവര് പങ്കെടുക്കും.
ഉച്ചയ്ക്ക് 2ന് അഭിനയത്തെ ആസ്പദമാക്കി പീശപ്പിള്ളി രാജീവന്റെ സോദാഹരണ പ്രഭാഷണം. 4ന് പുറപ്പാട്, ഇരട്ട മേളപ്പദം. 5.30ന് രാധാകൃഷ്ണവാര്യര് രചനയും സംവിധാനവും നിര്വഹിക്കുന്ന പെരുവനം മേളപ്പെരുമ’എന്ന ഡോക്യുമെന്ററിയുടെ പൂജ ഡോ. പി.വി. വിശ്വനാഥന് നമ്പൂതിരിയും, സ്വിച്ച് ഓണ് കര്മ്മം പി. ബാലചന്ദ്രനും നിര്വഹിക്കും.
പത്മശ്രീ പെരുവനം കുട്ടന്മാരാര്, ഗീതാകുട്ടന്മാരാര്, ബാബു നമ്പൂതിരി തുടങ്ങിയവര് പങ്കെടുക്കും. 6.30ന് സുഭദ്രാഹരണം കഥകളി. 8.30ന് രാധാകൃഷ്ണവാര്യര് രചനയും സംവിധാനവും നിര്വഹിച്ച വേഷം കലാമണ്ഡലം ഗോപി’എന്ന ഡോക്യുമെന്ററി പ്രദര്ശിപ്പിക്കും.
രാധാകൃഷ്ണവാര്യര് ഒപ്പിയെടുത്ത ചിത്രങ്ങളുടെ പ്രദര്ശനം ‘ചിത്രരഥവും, കഥകളി കോപ്പുകളുടെ പ്രദര്ശനം ചമയവും അന്ന് ഉണ്ടായിരിക്കും.
