പൊതുനിരത്തില് തുപ്പുന്നത് നിയമവിരുദ്ധമാണ്. എന്നാല് ഇങ്ങനെയൊരു നിയമം നിലവിലുള്ളതായി യാതൊരു ബോധവും ജനങ്ങള്ക്കില്ല. പലരും തുപ്പാന് കണ്ടെത്തുന്ന സ്ഥലംതന്നെ റോഡാണ്. ബസില് യാത്ര ചെയ്യുന്ന ചിലര് പുറത്തേക്ക് തുപ്പുന്നത് അങ്ങേയറ്റം അലസമായാണ്. ഇതില് പലരും മുറുക്കിതുപ്പുന്നവരുമാണ്.
പലപ്പോഴും ബസ് തൊഴിലാളികളാണ് ഇവര്ക്ക് വഴികാട്ടുന്നത്. പാര്ക്ക് ചെയ്തിരിക്കുന്ന ബസില്നിന്ന് തല പുറത്തേക്കിട്ട് മുഖം കഴുകുന്നതും, ഭക്ഷണം കഴിച്ചശേഷം കുലുക്കുഴിഞ്ഞ് റോഡിലേക്ക് തുപ്പുന്നതും പലരുടെയും പതിവാണ്.
റോഡരികിലുള്ള, ‘വാഷ്’ ഇല്ലാത്ത ചായക്കടകളില്നിന്ന് ചായ കുടിക്കുകയോ ഭക്ഷണം കഴിക്കുകയോ ചെയ്തശേഷം വായില് വെള്ളംകൊണ്ട് റോഡിന്റെ ഒത്തനടുവില് വന്ന് തുപ്പുന്നവരുമുണ്ട്. ചില ഹോട്ടലുകള് മലിനജലം ബക്കറ്റില് കൊണ്ടുവന്ന് ഒഴിക്കുന്നത് നടുറോഡിലാണ്.
ഇതിന് പരിഹാരം കാണേണ്ടിയിരിക്കുന്നു. പൊതുസ്ഥലങ്ങളിലെ പുകവലി നിയമവിരുദ്ധമാക്കിയപ്പോള് അത് പ്രായോഗികമല്ലെന്ന് പലരും പറഞ്ഞിരുന്നു. എന്നാലിപ്പോള് ഈ നിയമം ഏറെക്കുറെ എല്ലാവരും പാലിക്കുന്നുണ്ട്. ഇതുപോലെ പൊതുനിരത്തില് തുപ്പുന്നതും നിര്ത്തല് ചെയ്യാനാകണം.
സി.വി. വാസുദേവന്,
ഇടപ്പള്ളി
