കൊച്ചി: നന്മ വിചാരവേദി, കുരുക്ഷേത്ര ബുക്സ്, അന്താരാഷ്ട്ര പുസ്തകോത്സവസമിതി എന്നിവയുടെ ആഭിമുഖ്യത്തില് കേരളീയ അനുഷ്ഠാന കലകളുടെ പ്രാധാന്യം വ്യക്തമാക്കുന്ന ഏകദിന ശില്പശാല ‘ശംഖൊലി’ സംഘടിപ്പിക്കുന്നു.
നാളെ രാവിലെ 10 ന് എറണാകുളം വളഞ്ഞമ്പലത്തുള്ള ‘എന്റെ ഭൂമി’ ഓഡിറ്റോറിയത്തില് തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് ഉദ്ഘാടനം ചെയ്യും. കലാനിരൂപകന് വി. കലാധരന് അധ്യക്ഷനാകും. ഏലൂര് ബിജുവിന്റെ സോപാനസംഗീതവും പാര്വ്വണേന്തു സ്കൂള് ഓഫ് തിരുവാതിരയുടെ തിരുവാതിര അവതരണവും നടക്കും.
പ്രശസ്ത അയ്യപ്പന് തിയ്യാട്ട് കലാകാരന് മുളങ്കുന്നത്തുകാവ് കൃഷ്ണന് നമ്പ്യാര് നേതൃത്വം നല്കുന്ന ശില്പശാലയില് അനുഷ്ഠാനകലയും കുലത്തൊഴിലും, അനുഷ്ഠാനകലയും സംഗീതവും, അനുഷ്ഠാനകലയും ചിത്രകലയും എന്നീ വിഷയങ്ങളില് ശ്രീദേവി രാജന്, ഏലൂര് ബിജു, കുമ്മനം രവി, വിനോദ് ലക്ഷ്മണ്, രമേശ് ലക്ഷ്മണ്, കാവാലം ശശികുമാര്, വെണ്ണല മോഹന്, മാലതി ജി. മേനോന് എന്നിവര് വിഷയാവതരണം നടത്തും.
